काठमाडौं, पुस १७ ।
प्रमुख विपक्षी दल नेकपा एमालेले यहीँ आउँदो पुस २२ गते गरिने जनप्रदर्शनलाई व्यवस्थित गर्न भन्दै करिब पाँच सय स्वयंसेवक परिचालन गर्ने तयारी गरेको छ ।

पार्टीका महासचिव ईश्वर पोखरेलको अध्यक्षमा आज बसेको एमाले केन्द्रीय कार्यालयको बैठकले जनपरिचालनलाई व्यवस्थित गर्न पाँच सय स्वयंसेवक खटाउने निर्णय गरेको हो । सरकारले ल्याएको संविधान संशोधन प्रस्तावको विरोधमा एमालेले काठमाडौंको भृकुटीमण्डपमा जनप्रदर्शन गर्दैछ ।

जनप्रदर्शन तथा त्यसको प्रचार–प्रसारलाई मर्यादित र व्यवस्थित बनाउने एमालेले जनाएको छ । बैठकले सांसद्हरूलाई आ–आफ्ना जिल्ला कमिटी, सम्पर्क कमिटी र मञ्चहरूसँग समन्वय गरेर तयारीमा जुट्न निर्देशनसमेत दिइसकेको छ ।