काठमाडौं, पुस १७ ।
व्यवस्थापिका संसद्को भोलि सोमबार बस्ने बैठकमा सरकारले संविधान संशोधन विधेयक जसरी पनि अघि बढाउने तयारीमा लागि परेको छ । नेकपा (माओवादी) केन्द्रका प्रवक्ता पम्फा भुसालकाअनुसार सहममित जुटाउनका लागि आज दिनभर प्रमुख प्रतिपक्षी दल नेकपा (एमाले)सँग छलफल गर्ने र सहमति नभएको खण्डमा प्रक्रिया अघि बढाउने तयारीमा प्रधानमन्त्री दाहाल रहेको बताएकी छन् ।

प्रधानमन्त्रीको सरकारी निवास बालुवाटारमा आज सञ्चारकर्मीहरूसँग कुरा गर्दै प्रवक्ता भुसालले प्रधानमन्त्री दाहाल मिलेर अघि बढ्ने अन्तिम प्रयासमा रहेको जानकारी दिएकी छन् ।

सञ्चारकर्मीहरूसँग भेटका लागि समय दिए पनि प्रम दाहाल उपस्थित नभएपछि उनले दाहाल सहमति जुटाउने प्रयासमा रहेकाले भेट्न सम्भव नभएको जानकारी दिइन् ।

उनले भनिन्, ‘सकेसम्म सहमति जुटाउन सफल हुनुहुनेछ ।’ माओवादी केन्द्र प्रतिपक्षलाई चिढ्याउने पक्षमा नरहेको र जसरी संविधान जारी गर्ने समयमा मिलेर संविधान जारी गरियो त्यसरी नै कार्यान्वयन पनि एकजुट भएर नै गर्ने साझा धारणा रहेको प्रवक्ता भुसालले जानकारी दिइन् ।