एजेन्सी, फागुन २० ।
अमेरिकामा आधारित प्यु रिसर्च सेन्टरको एक अध्ययन प्रतिवेदनअनुसार सन् २०५० सम्ममा भारत विश्वकै सबैभन्दा बढी मुस्लिम जनसंख्या भएको देश हुने र त्यसको जनसंख्या ३० करोड पुग्ने एक अध्ययनले देखाएको छ ।

तथ्याङ्कअनुसार विश्वमा सन् २०१० देखि २०५० को अवधिबीच मुस्लिमको जनसंख्या ७३ प्रतिशत बढ्ने छ । हाल सबैभन्दा ठूलो मुस्लिम जनसंख्या भएको मुलुक इन्डोनेसिया हो भने भारत मुस्लिमको दोस्रो ठूलो जनसंख्या भएको मुलुक हो । तर सन् २०५० सम्ममा भारत मुस्लिमको सबैभन्दा ठूलो जनसंख्या भएको देश बन्ने सो अध्ययन प्रतिवेदनको दाबी छ ।

त्यसैगरी क्रिश्चियनको जनसंख्या ३५ प्रतिशतसम्म र हिन्दूको जनसंख्या ३४ प्रतिशतसम्म बढ्ने अध्ययनले देखाएको छ । दि फ्युचर अफ वल्र्ड रिलिजन शीर्षकको प्रतिवेदनमा भनिएको छ, ‘सन् २०५० सम्ममा विश्वको जनसंख्या ३५ प्रतिशतले बढ्ने छ । यदि मौजुदा दरमै जनसंख्या बढ्ने हो भने सन् २०७० सम्म विश्वमा सबैभन्दा धेरै मानिसले मुस्लिम धर्म मानेका हुनेछन् ।’

हाल विश्वमा सबैभन्दा ठूलो जनसंख्या क्रिश्चियन धर्मावलम्बीको रहेको छ । दोस्रो नम्बरमा मुस्लिम, तेस्रो नम्बरमा नास्तिक र चौथो नम्बरमा हिन्दू धर्मावलम्बी छन् ।