काठमाडौं, फागुन २१ ।
आज र भोलि दुई दिन स्वास्थ्यकर्मीको अवरोधका कारण यसअघि खुवाउन बाँकी रहेको १५ जिल्लामा पोलियो थोपा खुवाइँदै छ ।

तराईका कैलाली, बर्दिया, बाँके, कपिलवस्तु, पर्सा, बारा, रौतहट, धनुषा, महोत्तरी, सप्तरी, सिरहा र सुनसरी तथा काठमाडौं उपत्यकाका काठमाडौं, ललितपुर र भक्तपुरमा पोलियो थोपा खुवाउने कार्यक्रम रहेको छ ।

पोलियो खुवाइने जिल्लामा केही स्वास्थ्यकर्मीले अवरोध गरेमा सुरक्षा व्यवस्था गरी मिलाई सेवा सञ्चालन गराउन स्वास्थ्य मन्त्रालयले गृह मन्त्रालयलाई पत्राचार गरेको छ ।

स्वास्थ्य संस्थाको तालाबन्दी खोली पोलियो खोप कार्यक्रम सञ्चालन गर्ने कार्यमा सहयोग गर्न स्वास्थ्य मन्त्रालयले शुक्रबार नै गृह मन्त्रालयलाई आग्रह गरेको हो । स्वास्थ्यमन्त्री गगनकुमार थापाले स्वास्थ्यकर्मीले स्वास्थ्य संस्थामा लगाएको ताला तत्काल खोली निर्विवाद रूपमा
पोलियोलगायत नागरिकले पाउने सबै स्वास्थ्य सेवा सञ्चालन गर्न आव्हान गरेका छन् ।

मन्त्रालयअन्तर्गत कार्यरत केही स्वास्थ्यकर्मीले स्वास्थ्य सेवा ऐन, २०५३ को दफा ९ ख को विशेष पदस्थापनाका विषयमा रहेको असमझदारीलाई लिएर स्वास्थ्य संस्थामा तालाबन्दी गरेका छन् । उनीहरूको माग सम्बोधन गर्न मन्त्री थापाले विभिन्न निर्णय गराइसकेका छन् ।

आगामी तीन महिनाभित्र संशोधित ऐनको मस्यौदा व्यवस्थापिका–संसद्मा पेश गरी सम्पूर्ण समस्याको समाधान गर्न मन्त्रालय प्रतिबद्ध रहेको मन्त्री थापाले विज्ञप्तिमार्फत स्पष्ट पारेका छन् ।

संसारबाट उन्मुलन हुन लागेको पोलियो थोपा पाँच वर्षमुनिका बालबालिकालाई खुवाउनका लागि मन्त्रालयले तोकेको मितिमा स्वास्थ्यकर्मीले स्वतःस्फुर्त रूपमा सफल बनाउनुपर्नेमा स्वयं स्वास्थ्यकर्मीबाट पोलियो थोपा खुवाउने कार्य रोक्ने कुरा कल्पनासमेत गर्न नसकिने उनको भनाई छ ।