एजेन्सी, फागुन २२ ।
सिरियाली सेनाको लडाकु विमान टर्कीको सीमा नजिक दुर्घटनाग्रस्त भएको छ । सिरिया र टर्कीको सीमानामा लडाकु जेट दुर्घटना भएको टर्कीका अधिकारीले बताएका छन् ।

आर्मीलाई उद्धृत गर्दै सिरियाको सरकारी टेलिभिजनले लडाकु जेटको हवाई सेनासँग सम्पर्क टुटेको जनाएको छ । लडाकु जेटका पाइलटको खोजी भइरहेको टर्कीका प्रधानमन्त्री बिनाली यिल्दिमिरिमले बताएका छन् ।

सिरिया सरकारसँग संघर्ष गरिरहेका इस्लामिक समूहले विमान आक्रमण गरी खसालिएको दाबी गरेका छन् । अहरार अल–शामले एक भिडियो ट्वीट गरेका छन्, जसमा विमानलाई निशाना बनाएको देखाइएको छ । इडलिब प्रान्तको उत्तरी क्षेत्रमा विमानलाई लक्षित गरी बम आक्रमण भएको अल–शामका प्रवक्ता अहमद काराएलीलाई उद्धृत गर्दै टर्कीको सरकारी समाचार संस्था एनाडोलुले जनाएको छ ।