दमौली, पुस १७ ।
नेपाली कांग्रेसका वरिष्ठ नेता एवं पूर्वउपप्रधानमन्त्री समेत रहेका रामचन्द्र पौडेलले अब यथाशीघ्र रूपमा तीन वटै तहको निर्वाचन हुने भएकाले सबै तयारी अवस्थामा रहन आफ्ना नेता तथा कार्यकर्ताहरूलाई निर्देशन दिएका छन् ।

तनहुँको भीमादमा आज कांग्रेसका कार्यकर्ताहरूबीच सम्बोधन गर्दै उनले सरकार संविधान संशोधन प्रक्रिया टुंग्याएर निर्वाचन गर्ने तयारीमा जुटिसकेको जानकारी आफूले पाएकोसमेत उनले बताएका छन् ।

‘सरकार जेठसम्ममा स्थानीय चुनाव गर्ने र मंसिरसम्ममा प्रदेश र संसद्को चुनाव गर्ने तयारीमा रहेको छ । त्यसैले तपाईहरू निर्वाचनका लागि तयारी हुनुहोस्’ नेता पौडेलले भने ।

संसद्मा अवरोध गर्नुको सट्टा नेकपा (एमाले)ले संसद् खुलाउन पहल गर्नुपर्ने बताउँदै उनले भने, ‘संविधान जारी गर्दा एक भएका दलहरू संशोधन प्रक्रियामा पनि एक भएर अगाडि बढनुपर्छ ।’