काठमाडौं, भाद्र १५ ।
गएराति राजधानीसहित देशभर मेघगर्जनसहित देशभर भारी वर्षा भएको छ । मनसुनी न्यूनचापीय क्षेत्र नेपालनजिकै रहेको अरेबियन सागरबाट जलवाष्पयुक्त हावा नेपाल प्रवेश गरेको र स्थानीय वायुको प्रभावका कारण गएराति १२ बजेदेखि मुलुकका प्राय स्थानमा अविरल वर्षासँगै ठूलो चट्याङसमेत परेको छ ।

मौसमविद् विभूति पोख्रेलकाअनुसार यी प्रणाली पूर्वदेखि पश्चिमसम्म नै फैलिरहेकाले आज पनि मुलुकका धेरै स्थानमा वर्षा हुनेछ । विशेषगरी पूर्वका धेरै स्थानमा ठूलो वर्षा हुने अनुमान गरिएको छ । लगातार वर्षा भएपछि बाढी तथा पहिरोको जोखिम बढ्दै जाने भन्दै भिरालो जमिन तथा नदी तटीय क्षेत्रका बासिन्दाहरूलाई उच्च सतर्कता अपनाउन मौसमविद् पोख्रेलले सुझावसमेत दिएका छन् ।

यसैबीच, आज पूर्वी पहाडी र तराईको क्षेत्रबाट बहने मेची, विरिङ, कन्काई, सुनसरी खोला, त्रियुगा र कोशीमा बाढीको जोखिम बढेको बाढी पूर्वानुमान महाशाखाले जनाएको छ । विशेषगरी पूर्वी पहाडी क्षेत्र र मध्य पहाडी क्षेत्रका केही स्थानमा झरीको सम्भावना बढी भएकाले भिरालो र कमजोर जमिनमा पहिरोको जोखिम बढेको छ ।

यसैगरी, पहाडी स–साना खोलामा आकस्मिक पहिरोसहितको बाढी आउने सम्भावना रहेकाले उच्च सतर्कता अपनाउनसमेत महाशाखाले आग्रह गरेको छ ।