गौशाला, फागुन २३ ।
महोत्तरीको जलेश्वर नगरपालिकाले आइतबार जिल्ला सदरमुकाम जलेश्वरभित्रका एक सय भन्दा बढी घरटहरा भत्काएको छ । नगरभित्रको बाटो फराकिलो बनाएको र पसलेले अतिक्रमण गरेको जग्गा खाली गराएको भन्दै जलेश्वर नगरपालिकाले नगरभित्रका एक सय भन्दा बढी पसल जथाभावी तोडफोड र भत्काउने काम भएको पसलेहरूले आरोप लगाएका छन् ।

त्यस्तै, नगरपालिकाका कार्यकारी अधिकृत भानुभक्त बरालले जिल्ला प्रशासन कार्यालयको निर्णयअनुसार नगरभित्र रहेका अतिक्रमित जग्गा खाली गराएको बताएका छन् ।

नगरभित्र रहेका अतिक्रमित जग्या एकाएक खाली गराएर व्यापारीहरूको संरचना भत्काउन थालेपछि व्यापारीले नगरपालिकाको स्काभेटरलाई नगरपालिका कार्यालय अगाडि घेरा लगाएर सामान्य ढुङ्गामुढा गरी तोडफोड गरेका छन् ।

व्यापारीले स्काभेटरमा तोडफोड गर्दा स्थिति तनावग्रस्त बनेको वातावरण आईतबार साँझ सर्वदलीय समितिले नगरपालिका कार्यालय प्रमुख भानुभक्त बरालसँग वार्ता गरेका थिए । तर सो वार्ता निष्कर्षविहीन भएको थियो ।