सप्तरी, फागुन २३ ।
नेकपा (एमाले)को मेची–महाकाली राष्ट्रिय अभियानअन्तर्गत अहिले सप्तरीमा सभा गर्ने तयारी गरिरहेकै बेला सभास्थलनजिकै दुई वटा बम फेला परेको छ ।

राजविराज नगरपालिका चार, मलेठमा प्रेसर कुकर र सकेट बम फेला परेको स्थानीय प्रहरीले जानकारी दिएको छ । अहिले बम फेला परेको ठाउँमा नेपाली सेनाको बम निस्क्रिय टोली पुगिसकेको छ । टोलीले बम निस्क्रिय बनाउने प्रयास गरिरहेको जिल्ला प्रहरी कार्यालय सप्तरीले जानकारी दिएको छ ।

बम कुन समूहले राखेको हो स्पष्ट भइसकेको छैन । एमालेले राजविराजको औद्योगिक क्षेत्रमा दिउँसो सभा गर्न लागेकोले त्यसलाई प्रभावित बनाउन बम राखिएको हुनसक्ने प्रहरीले अनुमान गरेको छ ।

यता, इनरुवामा आयोजित जनसभामा एमालेका शीर्ष नेताहरू सहभागी भएर सप्तरीको राजविराजतर्फ लागेका छन् । मोर्चाले एमाले अध्यक्ष केपी शर्मा ओलीविरुद्ध नाराबाजी गरेको छ । सम्भावित झडपलाई मध्यनजर गर्दै सुरक्षा व्यवस्था थप कडा पारिएको प्रहरीले जनाएको छ ।