सप्तरी, फागुन २४ ।
नेकपा (एमाले)को ‘मेची–महाकाली राष्ट्रिय अभियान’लाई लक्षित गरी विरोध गर्ने क्रममा सप्तरीको राजविराजमा भएको मधेशी मोर्चाका कार्यकर्ता र प्रहरीबीचको झडपमा गोली लागेर मृत्यु हुनेहरूको संख्या सात पुगेको छ ।

मधेशमा भइरहेको हत्या, हिंसाको विरोधमा मधेशी मोर्चाले दुई दिने मधेश बन्दको घोषणासमेत गरेको छ । मधेशी युवाहरूले मधेशी मोर्चाले संसद्बाट सामूहिक राजीनामा दिनुपर्ने मागसमेत गर्न थालेका छन् । सप्तरीमा तनाव बढेपछि एमाले सोमबार नै आकस्मिक स्थायी कमिटीको बैठक बसी तीन दिनको लागि स्थगित गरिसकेको छ ।

यसैगरी, हिजोको घटना पुनः नदोहोरियोस् भन्ने आशयले आज व्यापक मात्रामा प्रहरी तैनाथ गरिएको छ ।

सोमबार भएको झडपको क्रममा प्रहरीले आफ्नोतर्फबाट २० जना घाइते भएको बताएको छ । प्रहरीको गोली लागी ज्यान गुमाउनेमा सञ्जन मेहता, दीगम्बर यादव, पीताम्बर मण्डल, आनन्द साह, अजय साह, अवधेश ठाकुर र सञ्जय मेहता रहेको बताइएको छ ।

यसैबीच, प्रधानमन्त्रीको आदेश बिना गोली चलाइएको भन्दै प्रहरीमाथी प्रश्न चिन्ह खडा भइरहँदा गोली हानिएको भिडियो सार्वजनिक भएको छ । भिडियोमा सुरुमा प्रहरी पछि हटेको र त्यही मौकामा मोर्चाका कार्यकर्ता प्रहरीमाथी जाइलागेको भिडियोमा प्रष्ट देखिन्छ । मोर्चाका कार्यकर्ता उग्र भएपछि प्रहरीले अन्तिम अवस्थामा आएर गोली चलाएको भिडियोमा देखिन्छ ।

हेर्नुस् भिडियो

https://www.youtube.com/watch?v=TGth_R7ATPQ