काठमाडौं, फागुन २४ ।
प्रधानमन्त्री पुष्पकमल दाहालले निजी बैंकिङ सेक्टरहरूलाई जनताप्रति उत्तरदायी हुन निर्देशन दिएका छन् । एनएमबी बैंकको आयोजनामा राजधानीमा गरीएको ‘ग्लोबल एलायन्स फर बैंकिङ अन भ्यालुज’ सम्मेलनको उद्घाटन गर्दै प्रधानमन्त्री दाहालले जनतामुखी नहुने बैंकहरूलाई सरकारले कारबाही गर्ने चेतावनी दिएका छन् ।

बैंकहरू सेवामुखी हुनुपर्ने भन्दै दाहाले ग्रामीण भेगसम्म पुग्न आग्रह गरेका छन् । कृषि, पर्यटन र उर्जा यि तीनवटै नेपालको विकासका आधार भएको भन्दै उनले लगानी गर्न पनि बैंकहरूलाई सुझाव दिएका छन् ।

उक्त कार्यक्रममा नेपाल राष्ट्र बैंकका गभर्नर डाक्टर चिरञ्जीवी नेपालले आर्थिक क्षेत्रको समृद्धिको आधार बैंकहरू भएकाले विकासका क्षेत्रमा लगानी गर्न आग्रह गरे । उनले स्थानीय समुदायको क्षेत्रमा लगानी गरेर समुदायको विकासमा केन्द्रीत भए सम्मुन्नत राष्ट्र निर्माण हुने बताए । बैंकहरू नाफामूखी नभएर सेवामूलक हुनुपर्ने कुरामा उनले जोड दिएका थिए ।

तीन दिनसम्म चल्ने सम्मेलनमा एसिया, अफ्रिका, अस्ट्रेलिया, अमेरिका, उत्तरकोरिया, युरोप लगायत देशका विभिन्न बैंकका प्रतिनिधि सहभागी छन् । सम्मेलनमा दक्षिण पूर्वी एसियामा मुल्य मान्यतामा आधारित बैंकिङ क्षेत्रका उपलब्धि र चुनौतिका बारेमा छलफल भइरहेको छ ।