काठमाण्डौ, फागुन २६ ।
कञ्चनपुरको सीमावर्ती आनन्द बजारमा भारतीय सीमा सुरक्षा बल (एसएसबी)ले चलाएको गोली लागेर एक नेपालीको मृत्यु भएको छ । कम्मरमा गोली लागेर गम्भीर घाइते भएका उनलाई धनगढीस्थित सिपी अस्पतालमा र्पुयाएलगत्तै डाक्टरले मृत घोषणा गरेका छन् । कैलालीका प्रमुख जिल्ला अधिकारी गोविन्द रिजालले घटनाको पुष्टि गर्दै एक जनाको मृत्यु भएको जानकारी दिएका हुन् ।

आनन्दबजारस्थित नेपाली भूभागमा नेपालीहरूले कल्भर्ट निर्माण गर्न लाग्दा गुगल म्यापले भारतको भूमि देखाएको भन्दै भारतीय एसएसबीले हस्तक्षेप गरी नेपालीहरूलाई कुटपिट गरेको थियो । एसएसबीको ज्यादतीको विरोधमा आज बिहानदेखि नेपालीले उक्त क्षेत्रमा प्रदर्शन गरिरहेका थिए । प्रदर्शन दमन गर्न भारतीय सुरक्षाकर्मीले हस्तक्षेप गर्दै गोली चलाउँदा स्थानीय गोविन्द गौतमको मृत्यु हुन पुगेको हो ।