काठमाडौं, पुस १७ ।
सहमतिको अन्तिम प्रयासका लागि बसेको शीर्ष तीन दलको बैठक आज पनि औपचारिकतामै सीमित हुन पुगेको छ ।

प्रधानमन्त्री पुष्पकमल दाहालले आव्हान गरेको बैठकमा नेपाली कांग्रेस, नेकपा (एमाले) र नेकपा (माओवादी केन्द्र) का शीर्ष नेताहरूबीच सहमति जुट्न नसकेको हो । कुनै ठोस निष्कर्ष नआएपछि बैठक सकिएको हो ।

बैठकपछि पत्रकारहरूसँग कुरा गर्दै एमाले अध्यक्ष केपी शर्मा ओलीले संसद्मा दर्ता गरिएको संविधान संशोधन प्रस्ताव फिर्ता लिनासाथ संसद् खुल्ने तर्क दोहोर्‍याए । ‘फिर्ता हुनासाथ खुल्छ । राम्रो हुन्छ र देश निर्वाचनमा जान्छ,’ उनले भने ।

सत्तापक्षले दबाबपूर्ण तरिकाले संसद्मा प्रस्ताव पेश गर्न रणनीति सुनिन्छ नि भन्ने पत्रकारको प्रश्नमा उनले ‘के को रणनीति ?’ भन्दै प्रतिप्रश्न गरे ।
एमालेसँग पनि संसद् अवरोधबाहेक अरू रणनीति नभएको भन्दै ओलीले भने, ‘सोझो हिसाबले प्रस्ताव फिर्ता लिनासाथ सकियो नि ।’

बैठकबाट बाहिरिने क्रममा कांग्रेस नेता रामचन्द्र पौडेलले कुनै निष्कर्ष ननिस्किए पनि छलफललाई पुनः निरन्तरता दिइने बताएका छन् । बैठकमा संसद्मा दर्ता भएको संविधान संशोधन विधेयक, अख्तियारका निलम्बित प्रमुख लोकमानसिंह कार्कीविरुद्धको महाअभियोग तथा निर्वाचन विधेयकमाथी छलफल भएको थियो ।

बैठकमा माओवादी केन्द्रबाट प्रधानमन्त्री दाहाल र नारायणकाजी श्रेष्ठ, नेपाली कांग्रेसबाट सभापति शेरबहादुर देउवा र रामचन्द्र पौडेल, नेकपा (एमाले) बाट अध्यक्ष केपी शर्मा ओली र वामदेव गौतम सहभागी थिए ।

सहमतिका लागि सभामुख ओनसरी घर्तीमगरले दिएको चार दिने अल्टिमेटम सकिएपछि संसद् बैठक बस्नुअघि सहमति जुटाउन दलहरू अन्तिम प्रयासमा छन् । संसद्को बैठक आज दिउँसो १ बजे बस्दैछ ।