काठमाडौं, कार्तिक १० ।
म्यान्मारमा भड्केको हिंसाका कारण बंगलादेशमा शरणार्थीका रूपमा रहिरहेका रोहिंग्या मुसलमानको संख्या ६ लाख कटिसकेको छ । यी शरणार्थीहरू कक्सेस बजारनजिकको कुतुपालोङ शरणार्थी शिविरमा बसिरहेका छन् ।

त्यहाँ शरणार्थीहरूलाई खाना र पानी जस्ता आधारभूत आवश्यकताका लागि पनि संघर्ष गरिरहनुपरेको छ । यस्तो अवस्थामा शिविरमा रहेका महिला र बालिकाहरू देशव्यापारमा लाग्ने जोखिम उच्च छ ।

लगभग ५०० रोहिंग्या महिलाहरू देहव्यापारमा संलग्न रहिसकेको बताइएको छ । दलालहरूको नजर शिविरमा रहेका महिलाहरूमाथि परेको छ । दलालका रूपमा काम गर्ने नूरका अनुसार, कुतुपालोङमा बस्ने ५०० रोहिंग्याहरू सेक्स वर्कर हुन् । उनीहरू विगत धेरै वर्षयता शिविरमा छन् ।

संयुक्त राष्ट्रसंघका नियोगहरूले शिविरमा कति सेक्स वर्कर छन् भन्ने थाहा नभएको बताएको छ । लैंगिक हिंसाको मामिलामा विज्ञका रूपमा जोडिएकी सबा जारीबले भनिन्, ‘उनीहरूको संख्या बताउन मुश्किल छ , हामी शिविरमा सेक्स वर्करको आँकडा जम्मा गर्दैनौं ।’

म्यान्मार सरकारले अल्पसंख्यक रोहिंग्याहरूलाई देशबाट लखेटेपछि उनीहरू बंगलादेशमा शरण लिएर बसिरहेका छन् ।