भक्तपुर, १८ पुस ।
नेपाल मजदूुर किसान पार्टीका अध्यक्ष नारायणमान बिजुक्छेले निर्वाचनको सम्बन्धमा कुनै पक्षबाट धम्की आए तत्कालै सरकार छाड्नु पर्ने बताएका छन् ।

रफत सञ्चार क्लबद्वारा आज आयोजित एक साक्षात्कार कार्यक्रममा बोल्दै उनले सार्वभौम सरकारले भित्री वा बाहिरी पक्षको धम्कीका कारण निर्वाचनलाई पर धकेल्न नहुने बताउँदै मधेशी मोर्चाका नेताहरूको परिवर्तन हुने बानी मधेशकै जनताले बुझिसकेका कारण तोकिएकै समयमा निर्वाचन गर्नुपर्नेमा जोडसमेत दिएका छन् ।

मधेशी मोर्चा बिना नै निर्वाचन सम्भव रहेको भन्दै अध्यक्ष बिजुक्छेले तत्काल निर्वाचन सम्भव भएको स्थानमा निर्वाचन गर्न सकिने र बाँकी रहेका स्थानमा पछि निर्वाचन गर्न सकिने बताए ।

उनले संसद्मा संशोधन विधेयक फिर्ता नलिए सरकारको आयु सकिने भन्दै संसद्बाटै निर्वाचनसम्बन्धी विधेयक पास गरी तोकिएकै समयमा सम्भव भएका स्थानमा निर्वाचन हुने बताए ।

वर्तमान सरकारले संशोधन विधेयक फिर्ता नलिए माओवादीले सरकारको नेतृत्व गुमाउने अवस्था देखिएको भन्दै संशोधन विधेयक नेपालीको चाहना विपरीत छिमेकीको इशारामा आएको र कांग्रेसले दाँते ओखर भनि नफुट्ने ओखर माओवादीलाई दिएर अल्झाई रहेको बिजुक्छेको भनाई थियो ।

निर्वाचन अघि नै सत्ता समिकरण बदल्न सक्ने अवस्था हिजो पनि रहेको र आज पनि रहेको भन्दै बिजुक्छेले माओवादीकै कारण एमाले र कांग्रेसको समिकरणमा नयाँ सरकार बन्ने टिप्पणीसमेत गरेका छन् ।

उनले नेपाली सरकारले नेपालीको चाहना भन्दा पनि भारतले जे जे भन्छ त्यहीअनुसार काम गर्नु नेपाली नेताहरूको कमजोरी रहेको र यसले नेपालको सार्वभौममा असर पारेको बताए ।