काठमाडौं, पुस १७ ।
व्यवस्थापिका संसद्को बैठकमा आज पनि प्रमुख प्रतिपक्षी दल नेकपा (एमाले)सहितका दलहरूले संविधान संशोधन विधेयक फिर्ता लिनुपर्ने माग गर्दै बैठक अवरुद्ध गरेको छ ।
नेकपा (माले)की सांसद् कमला विकले बोले लगत्तै विपक्षी सांसद्हरू आ–आफ्नो स्थानबाट उभिएर अवरोध गरेका थिए । अरू दिनभन्दा आज अलि बढी समय अर्थात करिब १० मिनेट सभामुख ओनसरी घर्तीमगरले सांसद्हरूलाई बस्न आग्रह गरेकी थिइन् । त्यसपछि आजै साँझ ४ बजे पुनः बस्ने गरी बैठक स्थगित भएको घोषणा गरेकी थिइन् ।
सिंहदरबारमा प्रमुख ती दलका शीर्ष नेताहरूबीच भएको छलफल निष्कर्षमा नपुगेपछि शीर्ष नेताहरू संसद् बैठकमा गएका छैनन् । प्रधानमन्त्री पुष्पकमल दाहाल, एमाले अध्यक्ष केपी शर्मा ओली, कांग्रेस सभापति शेरबहादुर देउवासहित सत्तापक्षका अधिकांश सांसद् अनुपस्थित रहेका थिए । दुई घण्टाको बीचमा सभामुखले सहमतिका लागि पहल गर्ने उनका प्रेस सल्लाहकार बबिन शर्माले जानकारी दिए ।