एजेन्सी, चैत्र ६ ।
विश्वको शक्तिशालि देशको रूपमा लिइने अमेरिकाको राष्ट्रपति भवन अहिले असुरक्षित छ । अमेरिकी राष्ट्रपति डोनाल्ड ट्रम्प अमेरिकाकै राष्ट्रपति भवन ‘ह्वाइट हाउस’ मा असुरक्षित रहेको तथ्य बाहिर आएको छ ।

अमेरिकाका एक पूर्व गुप्तचर अधिकारीले जनाएअनुसार अमेरिकी राष्ट्रपति ह्वाइट हाउसमै असुरक्षित छ । ह्वाइट हाउसमा आतंकवादी हमला भएमा राष्ट्रपति ट्रम्पको सुरक्षामा देशको सीक्रेट सर्भिस असफल हुने बताएका छन् ।

पूर्व राष्ट्रपति बाराक ओबामा र जर्ज बुशको सुरक्षाको जिम्मेवारी सम्हालिसकेका पूर्व सीक्रेट एजेन्ट डेन बोनगिनोले यस्तो तथ्य प्रकाशमा ल्याएका हुन् । उनले केही दिनअघि मात्र एकजनाले ह्वाइट हाउसको सुरक्षा व्यवस्थाको धज्जी उडाउँदै ह्वाइट हाउसभित्र करिब १५ मिनेट बिताएको तथ्य पनि उल्लेख गरेका छन् ।

उनले भने, ‘ह्वाइट हाउसभित्रका केही सूचकहरू उसले बन्द गरिदिएको थियो, यसबाट पनि ह्वाइट हाउसको सुरक्षामा रहेका कमीहरू उजागर भएको छ ।’

फक्स न्यूजको अन्तरवार्तामा बोनगिनोले भनेका छन्, ‘यो घटनाबाट पनि प्रष्ट हुन्छ कि हाम्रो राष्ट्रपति ह्वाइट हाउसमै सुरक्षित हुनुहुन्न, सीक्रेट सर्भिससँग त्यति धेरै जनशक्ति पनि छैन कि राष्ट्रपतिलाई पुरा सुरक्षा दिन सकोस् ।’ ‘सीक्रेट सर्भिसले ह्वाइट हाउसमा प्रवेश गरेको एउटा व्यक्तिलाई १५ मिनेटसम्म पक्राउ गर्न सकेन, तपाई सोच्नुस्, एकसाथ ४० आतंकवादीले हमला गरेमा के होला !’