काठमाडौं, पुस १९ ।
भारतको उत्तराखण्डमा एउटा जिप दुर्घटना हुँदा एकै परिवारका चार नेपालीसहित छ जनाको ज्यान गएको छ ।

मृत्यु हुनेमा बैतडी शर्माली–२ डोबराका गोमादेवी साउद, गोविन्दसिंह साउद, बासुसिंह साउद र बासुकै पाँच वर्षीय नाति रहेको जिल्ला प्रहरी कार्यालय बैतडीका प्रहरी नायब उपरीक्षक हेरम्ब शर्माले जानकारी दिएका छन् ।

दुर्घटनामा परी सोही परिवारकै अन्य चार सदस्य पनि घाइते भएका छन् । उनीहरूको नाम पहिचान हुन बाँकी रहेको र भारतकै एक स्थानीय अस्पतालमा उपचार भइरहेको प्रहरीले जनाएको छ । बैतडीको शर्माली घर भएका उनीहरू कञ्चनपुरबाट भारतको बाटो हुँदै घर फर्किरहेका बताइएको छ ।

भारतको उत्तराखण्डअन्तर्गत लुहाघाटबाट सुगरखालतर्फ आइरहेको जिप आइतबार अपरान्ह मणिलेकनजिकै दुर्घटनामा परे पनि सोमबार मात्रै खबर आइपुगेको हो । दुर्घटनामा दुई भारतीयको पनि ज्यान गएको बताइएको छ ।