विवेकशील साझा पार्टी
ललितपुर क्षेत्र नं. ३ प्रतिनिधि सभा उम्मेदवार

आसन्न प्रतिनिधि सभा र प्रदेश सभा निर्वाचनमा विवेकशील साझा पार्टीबाट ललितपुर क्षेत्र नं. ३ बाट प्रतिनिधि सभा उम्मेदवारमा उठ्नुभएका एक कर्मठ व्यक्तित्वका रूपमा परिचित रहेका उज्ज्वलकृष्ण श्रेष्ठसँग लाईभ अफ नेपालले गरेको विशेष अन्तर्वार्ताको सम्पादित केही अंश र विस्तृतमा भिडियोसहित ।

आजभोलि के मा व्यस्त हुनुहुन्छ ?
आजभोलि चुनावकै कार्यक्रमहरूमा व्यस्त छु । घरदैलो अभियान भइरहेको छ । दिनचर्या सोचेको भन्दा पनि धेरै फरकपन महशुस गरिरहेको छु । बिहानदेखि मतदाताहरूको घर–घरमा गएर घरदैलो अभियान र विभिन्न सभा र कार्यक्रमहरूमा मतदाताहरूसँगको अन्तरक्रियामा व्यस्त छु ।

घरदैलो अभियानमा जाँदै हुनुहुन्छ ? उम्मेदवार माझ कसरी प्रस्तुत भइरहनु भएको छ र कस्तो खालको प्रतिबद्धता दिनुभयो ?
म एउटा साधारण व्यावसायी, राजनीतिमा भर्खरै मात्र पाईला टेकेको व्यक्ति हुँ । मैले देशको आवश्यकतानुसार नै युवा नेता नयाँ सोच भएका नेताको जरुरी भएकाले राजनीतिमा लागे । मुलुक र जनताको सोचअनुसार परिवर्तनको आवश्यकता देखिएकाले जनताको साथ, समर्थन र सहयोगले म पनि अघि सरेको हुँ । फेरी विवेकशील साझा पार्टी पनि भर्खरै आएको छ, नयाँ सोचका साथ केही गर्छु भन्ने आँट गरेर आउँदा घरदैलो अभियानमा जाँदा हरेक ठाउँमा म स्वयमलाई चिन्ने भन्दा पनि विवेकशील साझा पार्टीलाई चिन्ने धेरै पाएँ । विवेकशील साझा पार्टीको योजना विचार मन पराईदिने धेरै मतदाताहरू देखेँ पनि र भेटे पनि । प्राय जनताको तराजुमा धेरै ठूलो आशा रहेछ । त्यहीँ भएर केही हदसम्म जित्छु भन्ने आशा छ ।

अब प्रतिबद्धताको सवालमा पहिला पनि धेरैले गरे तर यहाँ केहीँ भएन । हाम्रो मुख्य उद्देश्य भनेकै लुटतन्त्रको अन्त्य गर्नु हो । देश अहिले भ्रष्टाचारले ग्रष्ट भइरहेको छ । त्यसको अन्त्य नै हाम्रो मुख्य मुद्दा हो । भ्रष्टाचारको अन्त्यसँगै देश विकास आफैँ हुन्छ । जस्तै मानौँ ८० करोड बजेट केहीँको लागि आयो भने यहाँ भाग लगाएर तलसम्म आइपुग्दा १० करोड हुन जान्छ । त्यो १० करोडले के विकास होला त ? तर हाम्रो पार्टीले माथीबाट जति बजेट निकासा भएको छ त्यसलाई सही ठाउँमा सदुपयोग गर्ने उद्देश्यका साथ अघि बढेका छौं ।

त्यसो भए विवेकशील पार्टी भ्रष्टाचार नियन्त्रणकै लागि आएको हो त ? ठूला दलका बीच विवेकशील कतै बिलाउने त होइन ?
यहाँनिर भ्रष्टाचारको अन्त्यसँगै अरू थुप्रै कुराहरूमा सन्तुलन आउँछ । जस्तै नभई नहुने तत्वहरू शिक्षा, स्वास्थ्यमा पनि आउने बजेटको सही रूपमा सदुपयोग हुनेछ । सरकारी क्षेत्रको स्तर बढ्छ । जनता शिक्षित भएपछि देश त आफैँ विकास हुन्छ । अरू बाँकी चिजहरू भनेको विस्तारै विकसित गर्दै लाने हो । अर्को कुरा भनेको बिलाउने सन्दर्भमा यस्तो छ, मलाई लाग्छ फलामको धेर बीच केही सुन भयो भने त्यो सुन फलाम हुँदैन, त्यो सुन नै हुन्छ । कुलमान घिसिङ एक जनाको अथक प्रयासले वर्षौंदेखि लोडसेडिङ्गको मार खेपिरहेका राजधानीबासीलाई लोडसेडिङ्ग मुक्त गराएर देखाउन सफल भयो भने हामी दुई चार जनाले किन नसक्ने ? त्यसैले राम्रो सोच लिएर अगाडि बढ्ने हो भने कसैले रोक्न पनि सक्दैन र असम्भव पनि छैन ।

तपाईंको क्षेत्रमा के–के विकासका अवसर छन् ? कुन–कुन ठाउँमा चुनौतीहरू पाउनु भयो ?
यहाँ थुप्रै अवसरहरू छन् । बाटोदेखि लिएर थुप्रै अवसरहरू पाएको छु मैले । प्लान बनाउँदा खेरी लेले जस्ता ठाउँमा विकास गर्न मिल्ने खुल्ला ठाउँमा गर्ने । पर्यटन विकास हुने ठाउँ हो यो । भोलिसम्म हुने योजनाहरूलाई लिएर नै अगाडि बढ्ने हो । चुनौतीहरू त भई हाल्छन् तर, चुनौतीसँगै लडेर जित्ने नै हाम्रो योजना हो । चुनौती भनेकै भ्रष्टाचार नै हो । हरेक ठाउँमा जस्तै नागरिकता बनाउन जाँदा, लाइसेन्स बनाउन जाँदा कुनै पनि सरकारी काममा जाँदा बिचौलियाहरू भइरहेकै हुन्छन् । चिया खर्च भन्दै मागेको हुन्छ । चिया खर्च भनेकै सानो भ्रष्टाचार, म यहीँ प्रवृत्तिलाई नियन्त्रण गर्न आएको हुँ । हरेक सरकारी निकायमा यस्ता खालका भ्रष्टाचारलाई निर्मूल पार्न पनि म स्वयम खटेर लाग्नेछु ।

अन्त्यमा मतदाताहरूलाई के भन्न चाहनु हुन्छ ?
सकभर आफ्नो अमूल्य भोटको सदुपयोग गर्नुहोला । क्षेत्र विकास गर्ने सही उम्मेदवार छान्नुहोस् । तराजुमा भोट दिएर तपाईंहरूले भोट दिनुहोला । देशले नेतालाई हेर्ने सोच नै परिवर्तन गर्नु जरुरी छ । त्यसकारण नयाँ सोच नयाँ विचारका साथ विवेकशील साझा पार्टी आएको छ । यसपटक हामीलाई पनि मौका दिनुस् । म सबै क्षेत्र नं. ३ का मतदाताहरूमा यहीँ आग्रहसमेत गर्दछु ।