संघीय समाजवादी फाेरम, नेपाल
काठमाडाैं, क्षेत्र नं. ८ प्रदेश सभा–२ ‘ख’ प्रत्यक्ष उम्मेदवार

जनताको हक र अधिकार सुनिश्चित गर्ने हेतुका साथ हाम्रो चाहना, समानता र सम्मान, अपमान होइन स्वाभिमान र पहिचान भन्ने मूल नाराका साथ संघीय समाजवादी फोरम नेपालबाट चुनावी मैदानमा उत्रिएका काठमाडौं क्षेत्र नं. ८ प्रदेश सभा २ ‘ख’ का प्रत्यक्ष उम्मेदवार मंगलरत्न ताम्राकारसँग लाईभ अफ नेपालले गरेको विशेष कुराकानीका सम्पादित अंश र विस्तृतमा भिडियो ।

चुनावको तयारी कत्तिको भइरहेको छ ?
चुनावी माहौल सबैलाई लागि रहेको छ । यसै क्रममा हामी घरदैलो अभियानमा धेरै नै व्यस्त रहेका छौं । संघीय समाजवादीको सहअध्यक्षको नेतृत्वमा अहिले विभिन्न सभा र घरदैलो अभियानमा व्यस्त रहेको छु । यसभन्दा अगाडि वडा अध्यक्षमा पनि उम्मेदवार भएको थिए । तर, विपक्षीको बलियो आधार थियो त्यो बेला तर, म समाजमा निश्पक्ष रूपमा समाजसेवा गर्दै आइरहेको हुनाले यो पटक जनताको मन जित्न केही सफल भएको छु ।

पहिचान र अधिकारको मुद्दालाई लिएर जनतामाझ जानुभएको छ, कस्तो खालका प्रतिक्रियाहरू पाउनु भयो ?
जनाता निकै नै खुसी भएको महशुस गरेको छु मैले । हाम्रो लागि आएको पार्टी जातीय पार्टी नभई पहिचानवादी पार्टी नै हो भनेर साथ दिएको पनि पाएको छु । हाम्रो पार्टीले सबैलार्इ समेटेर लगेको छ । त्यही भएर यही पार्टी हो, समानुपातिक । हर क्षेत्रमा यही पार्टीले सबै मिलाएर लग्नेमा म विश्वस्त छु । यही विषयमा बेला–बेलामा विभिन्न प्रतिक्रियाहरू पनि आए, जातीय कुरामा । तर आफ्नो पहिचानको माग गरेको हो हाम्रो पार्टीले । हरेक ठाउँमा एक जातिको प्रतिनिधित्व भएको छ । हामो आवाज खोइ त यहाँ ? आफ्नो पहिचान त चाहियो नि हामीलाई । यस्तै कुरालाई ध्यानमा राखेर अघि बढ्दा जनताको साथ पनि पाइरहेको छु ।

के–कस्ता प्रतिबद्धता लिएर जनता माझ पुग्नु भएको छ ?
मेरो मुख्य प्रतिबद्धता भनेकै समाजलाई नयाँ गति दिने हो । म आदिबासी, जनजाति एवं देशमा रहेका सम्पूर्ण जाति जनजातिहरूको हितका निमित्त संघर्ष गर्ने नै हो । महिला, ज्येष्ठ नागरिकको हक हितको सुनिश्चित गर्न सदैब तत्पर हुने देखि लिएर स्थानीय जात्रा पर्व सञ्चालनका लागि बजेट व्यवस्थापन गर्ने योजना छ । पर्यटन व्यावसायलाई फस्टाउने प्रयत्न गरी बेरोजगार अन्त्य गर्ने आदि योजना रहेको छ । जनताको साथ र समर्थनसँग नयाँ नेपाल जहाँ भ्रष्टाचार, असुरक्षा, महँगीविरुद्ध लड्न हरदम हाम्रो पार्टी लागि पर्ने छ ।

अन्त्यमा के भन्न चाहनुहुन्छ मतदातालाई ?
हाम्रो लागि बनाइएको संविधानले हाम्रो हक हित सुनिश्चित गरेको छैन । हामी यहाँहरूकै हक हितका लागि आएका छौं । पहिचानसहितको संघीयता । समाजवादलाई सार्थक बनाउन र स्वाभिमानी नेपाली जनतालाई सम्मानका साथ बाँच्न आफ्नो अमूल्य मत हातले समातेको मसालमा दिई सहयोग गरी दिनु होला । आफ्नो मत सही व्यक्तिलाई दिनु हुनेछ भन्ने मैले विश्वास लिएको छु । जय नेपाल ।