काठमाडौं, पुस १९ ।
शहरी विकास मन्त्री अर्जुननरसिंह केसीले व्यवस्थापिका संसद्को बैठक चलिरहेका बेला मुखबाट खैनी झिकेर थुकेको नभई दालचिनी थुकेको बताएका छन् ।

मन्त्री केसीले आफू व्यवस्थापिका संसद्को मर्यादाप्रति सचेत रहेको बताउँदै उनले भने, ‘सबैलाई अचानक गाह्रो हुन सक्छ । कहिले बसेकै ठाउँमा वान्ता पनि हुन सक्छ ।’ उनले अगाडि भने, ‘दालचिनी चपाएपछि फाल्न समस्या भयो मैले त्यहीँ फालिदिएको हुँ ।’

संसद् बैठकमै मन्त्री केसीले खैनी थुकेको समाचार बाहिर आएपछि उनले आफ्नो बचाउसमेत गरेका छन् । ‘मैले मुखबाट खैनी झिकेर संसद्मा फालेको होइन, म केही दिनदेखि बिरामी थिएँ, दालचिनी खाइरहेको थिएँ त्यही फालेको हुँ ।’

राजधानीमा आज आयोजित एक कार्यक्रममा बोल्दै मन्त्री केसीले संसद्भित्रको गतिविधि बाहिर आउनु दुःखद् भएको बताउँदै उनले भने, ‘संसद्भित्रको गतिविधि कसरी बाहिर आयो ?, तस्वीरसहित त्यो समाचार बाहिर आएपछि म आफैँ पनि अचम्ममा परेको छु ।’