काठमाण्डौ, चैत्र ११ ।
आज विश्व क्षयरोग दिवस नेपालमा पनि विभिन्न जनचेतना मुलक कार्यक्रमको आयोजना गरी मनाइँदै छ । विश्व क्षयरोग दिवसको यस वर्षको मूल नारा ‘टीबी विरुद्धको एकता, कोही पनि नछुटोस्’ भन्ने रहेको छ । हरेक वर्ष मार्चको २४ तारिखका दिन विश्व क्षयरोग दिवस मनाइने गरिन्छ । यो दिवसको शुरुवात विश्व स्वास्थ्य संगठनको अगुवाईमा सन् १९९५ बाट भएको हो ।

क्षयरोग माईकोब्याक्टेरियम ट्युबरक्लोसिस नामको ब्याक्टेरियाका कारण लाग्ने रोग हो । श्वासप्रस्वासका माध्यमबाट सजिलै सर्ने क्षयरोगको संक्रमण मधुमेह, एचआईभी, मिर्गौला प्रत्यारोपण गरेका, क्यान्सर जस्ता प्रतिरोध क्षमता कम भएका रोगीलाई छिटो लाग्ने गर्दछ ।

नियमित औषधी सेवन गरेमा निको हुने क्षयरोगका कारण विश्वमा हरेक वर्ष १५ लाखको मृत्यु हुने गरेको छ भने विश्वमा हरेक वर्ष ९० लाख नयाँ क्षयरोगी देखापर्ने तथ्याङ्कले जनाएको छ ।

राष्ट्रिय क्षयरोग केन्द्रकाअनुसार नेपालमा हरेक वर्ष ४५ हजार नयाँ क्षयरोगी थपिने गरेका छन् भने ३० हजारले मात्र स्वास्थ्य सेवा लिइरहेका छन् । नेपालमा ८० हजार ५० जना क्षयरोगी भएको सरकारी तथ्यांक छ । नेपालमा वर्षेनी ५ देखि ७ हजार क्षयरोगीको मृत्यु हुने गरेको छ ।

दिवसका अवसरमा राष्ट्रिय क्षयरोग केन्द्र तथा मुलुकभर कै क्षयरोग निवारण सम्बन्धी कार्यक्रम सञ्चालन गर्दै आएका सरकारी तथा गैरसरकारी संस्थाहरूले विविध कार्यक्रम को आयोजना गरेका छन् ।