एजेन्सी, चैत्र ११ ।
आफूले प्रेम गरेको मानिसले धोका दिँदा कसको मन रुँदैन ? को नरोला र ? यस्तो बेला धोकेबाजको बदला लिन, धोकेबाजलाई देखाईदिन वा विगतका प्रेम सम्बन्धका यादहरू भुलाउन संसारमा मायालुहरूले अनेक उपाय निकाल्छन् । गर्न सक्ने जति सबै गर्न पनि पछि पर्दैनन् ।

कतिले धोका दिनेको अनुहार कहिँल्यै हेर्न नपरोस् भनेर डेरासमेत सर्छन् । अनि कतिपयले बोलीसमेत बार्छन् । तर, यहाँ हामी तपाईंहरूलाई केही फरक कुरा बताउँदै छौं ।

कुरा अष्ट्रेलियाको मेलवर्न भन्ने ठाउँको हो । जहाँकी २६ वर्षीया एक युवती हिदी रुहोनेनले आफ्नो धोकेबाज प्रेमीलाई देखाईदिने अनौठो उपाय अपनाएकी छन्, जुन सुन्दा पनि हाँसो उठ्छ ।

मेलवर्न विश्वविद्यालयकी विद्यार्थी हिदी लामो समयदेखि कुनै युवकसँग प्रेम सम्बन्धमा थिइन् । तर, हाल आएर उसले आफूलाई चिटिङ गरिरहेको कुराको सुइँको पाएपछि उनको मन सार्‍है दुखेछ । त्यसपछि उनले धोकेबाजलाई ठीक पार्ने निधो गरिन् ।

उनले बदला यसरी लिने सोचिन् की, जो कोहीले कल्पना गर्न पनि गार्‍हो हुन्छ । उनले धोकेबाज प्रेमीले आफूलाई उपहार दिएका सबै सामानहरूको पसल थापेर बिक्री गरिन् । ब्वाईफ्रेण्डले दिएका कपडा, जुत्ता, भिडियो गेम, फिल्म, किताब आदि सामान उनले आफ्नो ग्यारेजमा सेलमा लगाइन् ।

र, मानिसलाई बेची दिइन् । ती सामानहरू बेचेर प्राप्त भएको सबै रकमले घुमफिरमा निस्कने योजना उनको छ । गज्जब छैन त ? धोकेबाज प्रेमीलाई बिर्सने रमाईलो काइदा ।