बैतडी, चैत्र ११ ।
संसारमा दिनहुँ जसो अचम्मको घटनाहरू घट्ने गरेका छन् । जुन रमाईलो घटना पनि हुने गर्छन् त कहिँले दुःखद् पनि । तर, जब नेपालमै त्यस्तो अचम्मको घटना घट्छन् सुन्ने मान्छे पनि अचम्ममा पर्ने गर्छन् ।

त्यस्तै घटना भएको छ बैतडीमा । बैतडीको एक दुर्गम तल्लोस्वराडकी एक महिलाले टाउको नभएको अनौठो बच्चालाई जन्म दिएकी छन् । मेलौली–६ महारुद्रकी २८ वर्षीया सुनिता पोखरेलले केशरपुर प्राथमिक स्वास्थ्य केन्द्रमा बिहीबार उक्त बच्चालाई जन्म दिएको स्टाफ नर्स जानकी महतोले जानकारी दिएकी छन् ।

जन्मिएको बच्चा छोरी रहेको छ, स्टाफ नर्स महतोले भनिन्, ‘आठ महिनामै सुनिताले जन्माएको बच्चाको टाउको नभएको र जन्मिने बित्तिकै बच्चाको मृत्यु भएको छ ।’

सुनिताको बच्चाको जन्म भने सामान्य रूपमा नै भएको तर बच्चाको जन्म भइसकेपछि अत्याधिक रक्तश्राव भएको अस्पताल श्रोतले बताएको छ । बच्चा जन्माउन स्वास्थ्य संस्थामा आएको भए पनि सुनिताको कोही पनि नआएको स्टार्फ नर्स महतोले बताइन् ।

उनले भनिन्, ‘घरपरिवार तथा आफन्त कोही नआउँदा रिफर गर्न पनि गार्‍हो भएको थियो ।’ सुनिताको भने अत्याधिक रक्तश्राव भएकाले बैतडीमा उपचार हुन नसक्दा सुदूरपश्चिम उपक्षेत्रीय अस्पताल डडेल्धुरामा रिफर गरिएको छ ।

पोखरेलको चार महिना हुँदा गर्भ जाँच गराउन आउँदा खेरी नै बच्चाको टाउको नभएको भने पनि आर्थिक अवस्था कमजोर हुँदा बाहिर जान नसकेको बताइएको छ । आर्थिक अवस्था कमजोर तथा अन्धविश्वासका कारण समयमै अस्पताल नजाँदा यस्तो अवस्था आएको स्थानीयबासी अर्जुन कुँवरले बताए ।

उनले भने, ‘स्वास्थ्यकर्मीले बच्चाको टाउको नभएको जानकारी दिए पनि धामी झाँक्रीको भरमा परेर अस्पताल नगएका हुन् ।’ सुनिताका श्रीमान् करन पोखरेल रोजगारीको सिलसिलामा भारतमा रहेका छन् । सुनिताले यसपटक दोश्रो बच्चाको रूपमा जन्म दिएकी हुन् ।

जिल्ला स्वास्थ्य कार्यालय बैतडीका प्रमुख डा. गुणराज अवस्थीले चार महिना अगाडि भिडियो एक्स–रे गर्दा खेरी नै टाउको नभएको भन्ने थाहा भएको र उपचार गर्न स्वास्थ्य संस्था नआएको बताए ।

‘गर्भ रहेको चार महिनाभित्र गर्भवती महिलाले कुनै पनि किसिमको औषधि सेवन गर्नु हुँदैन’, उनले भने, ‘केही औषधि सेवन गरेको हुनसक्छ ।’ औषधि सेवन गरेर बच्चाको शरीरको मात्रै विकास भएको र टाउकाको नभएको हुनसक्ने भए पनि यो अहिलेसम्म पुष्टि नभएको उनले बताए ।

बैतडीमा उपचार हुन नसक्दा सुदूरपश्चिम उपक्षेत्रीय अस्पताल डडेल्धुरा रिफर गरिएकी सुनिताको डडेल्धुरामा पनि रगत नपाउँदा उपचारमा समस्या भएको डा. नवराज जोशीले जानकारी दिए ।