इटहरी, पुस ९ ।
इटहरीमा मृत्यु घोषणा गरिएको व्यक्ति ब्युँझिएको अपत्यारिलो घटना घट्न पुगेकाे छ । इटहरी उप–महानगरपालिका–१९ बस्ने ३२ वर्षीय इन्द्र गिरीको मृत्यु भएको भन्दै अस्पतालले ‘डेथ सर्टिफिकेट’ बनाउँदै गर्दा उनी चलमलाएका हुन् ।

पुस ३ मा झुण्डिएर आत्महत्या गर्ने प्रयास गरेका उनलाई तत्काल परिवारले धरानस्थित विपी कोइराला स्वास्थ्य बिज्ञान प्रतिष्ठानमा उपचारको लागि लगेको थियो । अस्पताल पुर्‍याउँदा उनी जीवनको अन्तिम अवस्थातिर पुगिसकेका थिए । तर, त्यहाँ आईसीयुको अभावका कारण धरानबाट विराटनगरस्थित लाईफ गार्डमा रेफर गरियो । त्यहाँ लगेर उपचार सुरु भयो ।

तर, अस्पतालले एक रात उपचार गरेपछि उनलाई मृतक घोषणा गर्यो । अस्पताल ‘डेथ सर्टिफिकेट’ बनाउन लाग्यो । तर, यही क्रममा एक डाक्टरले अचानक उनको ‘पल्स’ चलिरहेको महशुस गरे । त्यसपछि पुनः उनलाई चिकित्सको सल्लाहअनुसार विराटनगरकै नोबेल मेडिकल कलेजमा रेफर गरियो । नोबेलका विशेषज्ञ चिकित्सको परामर्शबाट गिरीको उपचार सुरु भयो । क्रमशः चमत्कारीक रूपमा उनको अवस्थामा सुधार देखियो । बुधबार अस्पतालले उनलाई घर फर्काइ दिइसकेको छ ।

श्रीमानको मृत्युको खबरसँगै बेहोस भएकी श्रीमती चन्द्रा गिरी पनि अहिले सही अवस्थामा फर्किएकी छन् । चन्द्राकाअनुसार श्रीमानले इन्द्रले अहिले खाना खान थालेका छन् ।