काठमाडौं, पुस २० ।
काठमाडौं उपत्यकाबासी सडक विस्तार पीडित संघर्ष समितिद्वारा आज आव्हान गरिएको क्रममा छ दर्जनभन्दा बढी बन्दकर्ता पक्राउ परेका छन् ।

रिङ्गरोडमा सवारी साधन बढीमा मात्रामा चलेको छ भने भित्री बाटोहरूमा भने सार्वजनिक यातायात कम मात्र चलेका छन् । उपत्यका बन्द गराउँदै हिँडेका बन्दकर्ताहरूलाई काठमाडौंको विभिन्न स्थानबाट पक्राउ गर्ने क्रम जारी नै रहेको छ । जसमा स्थानीयबासी, बालबालिका, सञ्चारकर्मीहरूसमेत पक्राउ परेका छन् । प्रहरीले कालिमाटीसहित गौशाला, बौद्ध, महाराजगञ्ज, टोखा, कलंकी, गोकर्ण, जोरपाटी, न्यूरोड जावलाखेललगायतका स्थानबाट बन्दकर्तालाई प्रहरीले नियन्त्रणमा लिएको हो ।

मूआब्जा नदिई सडक विस्तार गरिएको र विस्थापितहरूको पुनःस्थापना नगरिएकोलगायत माग राख्दै काठमाडौं उपत्यकाबासी सडक संघर्ष समितिले आज उपत्यका बन्दको आव्हान गरेको हो । सरकारले अब पनि माग पूरा नगरे चरणबद्ध आन्दोलनको घोषणा गर्दै सडकदेखि सदनसम्म आन्दोलन गर्ने बन्दकर्ताहरूको तयारी रहेको छ । अबको आन्दोलन सिंहदरबारदेखि संसद् भवनसम्म केन्द्रित हुने काठमाडौं उपत्यकाबासी सडक विस्तार पीडित संघर्ष समितिले जनाएको छ ।

यसैबीच, समाचार संकलनार्थ गएका सञ्चारकर्मीहरूलाई समेत पक्राउ गरिएको विरोधमा नेवाः पत्रकार राष्ट्रिय दबूका अध्यक्ष श्रीकृष्ण महर्जनले आज एक विज्ञप्ति जारी गरी पक्राउ परेका पत्रकारहरूको निःशर्त रिहाको माग गर्दै घटनाप्रति घोर भत्र्सनासमेत गरेको छ ।

जारी विज्ञप्तिमा भनिएको छ, राज्यको प्रतिनिधिका रूपमा रहेका प्रहरी प्रशासनले यस प्रकारको निन्दनीय व्यावहारले संविधान प्रदत्त प्रेस स्वतन्त्रतामाथी नै कुठाराघाट गरेकोमा देशभरका नेवार पत्रकारहरूको संगठन सो कार्यको घोर भत्र्सना गर्दै पक्राउ परेका सञ्चारकर्मीहरूलाई तत्काल रिहा गरी निर्वाध रूपमा समाचार संकलन गर्न पाउने अधिकारको सम्मान गर्न माग गरिएको छ ।

समाचार संकलनार्थ पक्राउ परेका सञ्चारकर्मीहरूमा नेपालभाषा टाइम्स दैनिकका उदेन न्हूसाय्मी, लहना साप्ताहिकका सुरेन्द्रभक्त श्रेष्ठ, कीर्तिपुर सन्देश साप्ताहिकका वरिष्ठ पत्रकार नजरराम महर्जन, उपत्यका एफ.एम.का विज्ञन तुलाधर, झीगु स्वनिगःका भागवत प्रधान तथा सुदय शिलाकार, शेषनारायण महर्जन, रविन्द्र श्रेष्ठ, नमस्ते साय्मीलगायत  रहेका छन् ।