काठमाडाैं, पुस २१ ।
सत्तारुढ दल नकेपा माओवादी केन्द्र, नेपाली कांग्रेस र मधेशी मोर्चाका शीर्ष नेताहरूको बैठक आज बस्दैछ । संविधान संशोधनका विषयमा छलफल गर्न तीन राजनीतिक शक्तिहरूको बैठक बस्न लागेको हो । प्रधानमन्त्रीको सरकारी निवास बालुवाटारमा दिउँसो ३बजे बस्ने बैठकमा संविधान संशोधनको प्रस्तावमा परिमार्जनका विषयमा छलफल हुनेछ । संविधान संशोधनको प्रस्तावलाई परिमार्जन गरेर सहमतिमा अगाडि बढाउने विषयमा बैठकमा छलफल हुने राष्ट्रिय मधेश समाजवादी पार्टीका महासचिव एवं प्रवक्ता केशव झाले जानकारी दिए ।

‘संविधान संशोधनलाई सहयोग गर्न मधेशी मोर्चा तयार छ’, उनले भने, ‘तर संशोधनको प्रस्तावमा केही विषय अपर्याप्त छन् । परिमार्जन कसरी गर्ने भन्ने विषयमा छलफल हुनेछ ।’ यसअघि पनि सो विषयमा पटक पटक छलफल भए पनि ठोस सहमति भने हुन सकेको छैन । मधेशी मोर्चा यथाअवस्थामा संशोधन प्रस्तावलाई समथर्न नगर्ने पक्षमा छ ।

तर अहिले पाएको अधिकारलाई संस्थागत गरेर थप अधिकारका लागि संघर्ष गर्नुपर्ने मधेशी मोर्चाका केही नेताहरूको धारणा पनि छ । आजको बैठकमा मधेशी मोर्चाले आफ्नो स्पष्ट अडान राख्ने बताइएको छ ।