भक्तपुर, चैत्र १७ ।
परापूर्वकालदेखि निरन्तर रूपमा चलाउँदै आएको मध्यपुर ठिमी नगरपालिकाको प्रसिद्ध जात्रामध्ये एक जिब्रो छेड्ने जात्रा यसपाली संकटमा पर्न लागेको भन्दै सो जात्राको इतिहासलाई कायम राख्न यस वर्ष जिब्रो छेड्न बुद्धकृष्ण बाग श्रेष्ठ अगाडि सरेका छन् ।

जात्रा नै रोकिने अवस्था आएपछि बोडेका ४५ वर्षीय बुद्धकृष्ण बाग श्रेष्ठ जिब्रो छेड्न तयार भएका हुन् ।

उनले यसअघि २०६२ देखि २०६५ सालसम्म चार पटक जिब्रो छेडिसक्नुभएको छ । २०६६ सालमा घरमा श्रीमती सुत्केरी भएपछि उनले जिब्रो नछेड्ने घोषणा गरेका थिए । त्यसपछि जुजुभाइ बासँ श्रेष्ठले जिब्रो छेड्दै आइरहनुभएको हो । विगत आठ वर्षदेखि जिब्रो छेड्दै आइरहेका जुजुभाइले यसवर्ष घरमा श्रीमती र भाउजू बिरामी भएकाले जिब्रो नछेड्ने घोषणा गरेसँगै जात्राका लागि जिब्रो छेड्ने व्यक्तिको खोजी सुरु भएको थियो ।

जात्रा नै रोकिने अवस्था आएकाले आफूले पुनः जिब्रो छेड्ने निर्णय गरेको बुद्धकृष्णले बताएका छन् । बोडेको जात्रामा बोडेबासीमध्ये पनि यहाँका श्रेष्ठ थरका व्यक्तिले मात्र जिब्रो छेड्नु पर्ने परम्परा रहेको छ । जिब्रो छेड्ने व्यक्तिले भोजभतेरसमेत गर्नुपर्ने भएकाले आर्थिक दृष्टिले धेरै सकस पर्ने बुद्धकृष्णले बताए । जात्राका लागि मध्यपुर थिमि नगरपालिका, संस्कृति मन्त्रालय, गुठी संस्थानलगायतले आर्थिक सहयोग गर्दै आइरहेका छन् ।

जिब्रो छेड्ने जात्रा प्रत्येक वर्षको वैशाख २ गते बिहान हुने गर्दछ । स्थानीय पाचोबाट सुरु हुने जात्रा बोडेका विभिन्न स्थान र नगरको परिक्रमापछि पुनः पाचोस्थित महालक्ष्मी मन्दिरमा पुगेर समापन गरिन्छ ।