काठमाडौं, पुस २१ ।
सत्तारुढ दल नेकपा माओवादी केन्द्रले सर्वोच्च अदालतबाट भएको फैसलाको स्वागत गर्दै व्यवस्थापिका संसद्मा दर्ता भएको संविधान संशोधन विधेयक छलफलको लागि अघि बढाउने निर्णय गरेको छ ।

उसले विधेयक छलफल गर्नको लागि सर्वोच्च अदालतले बाटो खोलेको निष्कर्ष निकाल्दै संविधान कार्यान्वयन गर्नको लागि पनि संविधान संशोधन विधेयक अब बस्ने संसद् बैठकमा अघि बढ्ने निर्णय गरेको हो ।

प्रधानमन्त्री पुष्पकमल दाहालको निजी निवास लाजिम्पाटमा बसेको केन्द्रीय कार्यालयको बैठकले विधेयक पारित गराउनको लागि दलीय छलफललाई तीब्रता दिने निर्णय गरेको केन्द्रीय कार्यालयका नेता मणि थापाले जानकारी दिए ।

यहीँ पुस २४ गते बस्ने व्यवस्थापिका संसद्को बैठकमा प्रस्ताव टेबुल गर्ने तयारी सरकारले गरेको छ । बैठकमा पार्टी अध्यक्ष समेत रहेका दाहालले संविधान संशोधन विधेयक पास हुने विश्वास व्यक्त गर्दै प्रस्ताव पारित भएपछि सरकारले निर्वाचनको घोषणा गर्ने जानकारीसमेत गराएका छन् ।