चितवन, चैत्र १८ ।
भरतपुर सरकारी अस्पतालमा एक महिलाको च्यापुको हड्डीमा भएको ट्युमर निकालिएको छ । ३४ वर्षीया अमेरिमाया रम्वेलको मुखको दाँया भागमा दुई वर्ष अघिदेखि मुखमा मासु पलाएको एक किलो पाँच सय ग्राम तौलको ट्युमर निकालिएको हो ।

अस्पतालका दन्त चिकित्सा विभागका कन्सल्टेन्ट डा. सन्तोष यादवको नेतृत्वको टोलीले माडी नगरपालिका–१२ बाँदरझुलाकी अमेरीमाया रम्वेलको सफल शल्यक्रिया गरेको हो ।

पलाएको मासुको परीक्षण (बायोप्सी) गरेपछि ओसीफाइ फाइब्रोमा भएको पत्ता लागेको चिकित्सकले बताएका छन् । विशेष गरेर ३० देखि ४० वर्षसम्मका महिलामा यो समस्या देखिने गरेको डा. सन्तोष यादवले बताएका हुन् ।

उनको दोस्रो पटक शल्यक्रिया गरेर पहिलाको अवस्थामा ल्याइने यादवले उल्लेख गर्दै उपचारमा ढिलाइ भए क्यान्सर हुनसक्ने जानकारी दिएका छन् । गरिबीका कारण उपचार गराउन नसकेकाले भरतपुर अस्पतालमा आएपछि अस्पतालले उनको निःशुल्क उपचार गरेको हो । आर्थिक अभावमा उपचारबाट वञ्चित नहुन भनेर सेवा प्रदान गरेको अस्पतालका अध्यक्ष राजकुमार राजभण्डारीले बताए ।