काठमाडौं, चैत्र २२ ।
नेपालीहरूको शान, मेहनत र लगनशीलताको बयान विदेशी पर्यटकहरूले बेला–बेलामा गर्दै आइरहेको कुरा अब कुनै नौलो रहेन । नेपालमा गएको विनाशकारी भूकम्पबाट समेत निराश नभई आफ्नो मेहनत र लगनशीलताले नेपाललाई थप उचाईमा पुर्‍याउन नेपालीहरू सफल भएका छन् ।

यस्तै आँट र भरोसाले नेपालीहरूले विदेशी पर्यटकहरूको मन जित्न सफल भएका छन् । यसको पछिल्लो उदाहरणको रूपमा विश्वकै सबैभन्दा विश्वासिलो गाईडबुक तथा ट्राभल वेबसाईटको रूपमा लिने कम्पनी अमेरिकाको ‘लोन्ली प्लानेट’ले विश्वका एक सय ९० मुलुकबाट छनौट गरेको उत्कृष्ट १० को पहिलो नम्बरमा नेपाल रहन सफल भएको छ ।

बेस्ट भ्यालु गन्तव्य मुलुकमा नेपालले सबैलाई पछाडि पार्दै एक नम्बर स्थान हासिल गरेको छ ।

‘लोन्ली प्लानेट’ले तयार पारेको सन् २०१७ मा घुम्नैपर्ने संसारका बेस्ट भ्यालु गन्तव्यमा नेपाल पहिलो नम्बरमा परेको हो । पर्यटकले खर्च गरेको पैसा खेर नजाने, पर्यटक सन्तुष्ट हुने स्थानलाई बेस्ट भ्यालु गन्तव्यको रूपमा सूचीकृत गर्छ ।

सूची तयार गर्नका लागि लाखौँ पर्यटकबाट प्रतिक्रिया र सुझाब लिइएको ‘लोन्ली प्लानेट’ले जनाएको छ । ‘लोन्ली प्लानेट’को भ्रमण गर्नैपर्ने बेस्ट भ्यालु गन्तव्यको सूचीमा नेपाल पर्नुलाई यस क्षेत्रका विज्ञहरूले ठूलो उपलब्धिको रूपमा लिएका छन् ।

‘लोन्ली प्लानेट’ले नेपालबारे तयार पारेको भिडियो हेर्नुहोस् ।