काठमाडौं, पुस २२ ।
नेपाल र चीनबीच सैन्य अभ्यासको मिति तय भएपछि अत्तालिएको भारतले नेपालका लागि नयाँ राजदूतका रूपमा भारतीय सेनाका पूर्वप्रमुख दलबीर सिंह ‘सुहाग’लाई पठाउने भएको छ ।

भारतीय सञ्चारमाध्यमले दिएको समाचारअनुसार डिसेम्बर ३१ मा अवकाश पाएका सिंहलाई नेपालमा बढेको चीनियाँ प्रभावलाई नियन्त्रण गर्न भारत सरकारले हालका राजदूत रञ्जित रेको स्थानमा प्रभावशाली व्यक्ति पठाउने तयारी गरेको हो । स्मरणीय के छ भने नेपाली सेना र भारतीय सेनाबीच राम्रो सम्बन्ध रहेको मानिन्छ । दुबै सेनाका प्रमुख एक अर्काको देशका सेनाको मानार्थ सेनापति हुने चलन छ ।

इतिहासमै पहिलो पटक नेपाल र चीनबीच पहिलो पटक फेब्रअरीमा हुन लागेको संयुक्त सैन्य अभ्यासले तर्सिएको भारतले सिंहले चीनियाँ प्रभाव कम गर्नसक्ने आँकलनसहित उनलाई नेपाल पठाउने तयारी गरेको भारत सरकारनिकट पत्रिका ‘नवभारत टाइम्स’ले लेखेको छ ।

नेपालका लागि हालका भारतीय राजदूत रेको कार्यकाल सकिनै लाग्दा भारतले नेपालका लागि नयाँ राजदूतमा केही समय अघि मात्रै अवकाश पाएका पूर्वभारतीय सेनाप्रमुख सिंहलाई पठाउँदा नेपाली सेनाले पनि यसलाई सहज रूपमा लिने भारतीय सरकारको अपेक्षा छ ।

नेपाल र चीनियाँ सेनाबीच संयुक्त अभ्यासको चर्चा चलेदेखि नै आपत्ति जनाएका भारतीयहरू नेपालमा चीनियाँ प्रभाव रोक्न र आफ्नो अस्तित्व रक्षा गर्नका लागि सक्षम र प्रभावशाली व्यक्ति पठाउने तयारी गरेको पनि ‘नवभारत टाइम्स’को समाचारमा उल्लेख गरिएको छ ।

त्यसो त प्रस्तावित राजदूत सिंह गत मंसिर महिनामा मात्रै सेनापतिका हैसियतमा नेपाल भ्रमणमा आएका हुन् । उनले नेपालमा रहँदा प्रधानमन्त्री पुष्पकमल दाहाल र प्रधानसेनापति राजेन्द्र क्षत्रीसँग भेटवार्ता गरेका थिए ।