काठमाडौं, पुस २२ ।
प्रमुख प्रतिपक्षी दल नेकपा एमालेका महासचिव ईश्वर पोखरेलले आज पार्टीद्वारा रत्नपार्कमा आयोजित वृहत विरोध सभामा बोल्दै नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल र नेपाली कांग्रेसका सभापति शेरबहादुर देउवालाई नामै किटान गरेर कटाक्ष प्रहार गरेका छन् ।

सभामा बोल्दै उनले कुनै पनि हालतमा आफूहरूले संविधान संशोधनको विषय नस्वीकार्ने बरु त्यसको बदलामा पूर्ण रूपमा आन्दोलनमा उत्रने कडा चेतावनीसमेत दिएका छन् ।

प्रमुख प्रतिपक्षी दल एमालेसहित नौ राजनीतिक दलले राजधानीमा आयोजित विरोध सभामा बोल्दै उनले देश बिखण्डन गर्न चाहनेहरूको अभिष्ट कहिल्यै पूरा नहुने दाबी गर्दै संविधान संशोधनको विषय असंवैधानिक रहेको दाबी गरे । उनले भने, ‘झन् सीमाङ्कनको विषयले सबै देशभक्त शक्तिहरूलाई एक ठाउँमा उभिनु पर्ने अवस्था श्रृजना गरेको छ’ ‘यो देशलाई हामीले कहिल्यै पनि बिखण्डनकारीको हातमा सुम्पन सक्दैनौँ ।’ उनले भने ।