काठमाडौं, चैत्र २५ ।
राजधानीमा मात्रै दैनिक हजारभन्दा बढी ट्राफिक नियम उल्लंघन गर्ने सवारी साधन कारबाहीमा पर्ने गरेको छ ।

महानगरीय ट्राफिक प्रहरी महाशाखाले दिएको पछिल्लो तथ्याङ्कअनुसार लेन अनुशासन, जथाभावी सवारी पार्किङ, मादक पदार्थ सेवन, बिना लाइसेन्स सवारी चलाउनेलगायत शीर्षकमा दैनिक हजारभन्दा बढी सवारी कारबाही हुने गरेको हो ।

महाशाखाका प्रहरी नायब उपरीक्षक विनोद घिमिरेले दैनिक दुई हजारभन्दा बढी सवारी साधन जाँच गर्ने र हजारभन्दा बढी सवारी साधनलाई कारबाही गरिएको बताए । उनले लेन अनुशासन, मापसे, लाइसेन्स जाँच, जथाभावी सवारी पार्किङलगायत कामलाई कडाईका साथ जाँच गरेपछि दुर्घटनामा केही कमी आएको समेत बताएका छन् ।

महाशाखाले ट्राफिक नियम उल्लङ्घन गर्नेलाई अवस्थाअनुसार रु. पाँच सयदेखि एक हजार पाँच सयसम्म जरिवानाका साथै एक घण्टा ट्राफिक जनचेतना कक्षा लिने गरेको छ । लेन काटेको सवारी साधन भाग्न खोजे विभिन्न क्यामराका माध्यमबाट फोटो खिच्ने र कारबाहीको दायरामा ल्याउने समेत गरेको छ ।