लमजुङ, चैत्र २५ ।
विश्व स्वास्थ्य दिवसको अवसरमा बेँसीशहरको बालगृहमा रहेका बालबालिकाको स्वास्थ्य परीक्षण गरिएको छ ।

जिल्ला जनस्वास्थ्य कार्यालय लमजुङको आयोजनामा बेँसीशहरस्थित आदर्श बालगृहमा रहेका बालबालिकाको निःशुल्क स्वास्थ्य परीक्षण गरिएको हो ।

बन्दकोठामा भाषण गर्नुभन्दा सेवा गरेर नै दिवस मनाउनु उपयुक्त ठानी निःशुल्क स्वास्थ्य परीक्षण कार्यक्रम आयोजना गरिएको जनस्वास्थ्य प्रमुख दुर्गादत्त चापागाईंले बताए ।

जिल्ला स्वास्थ्य समन्वय समितिका संयोजक एवं स्थानीय विकास अधिकारी डिल्लीराम सिग्देलको अध्यक्षतामा भएको सो कार्यक्रममा निमित्त प्रमुख जिल्ला अधिकारी तीर्थ थापाले बालगृहमा रहेका बालबालिकाको स्वास्थ्य परीक्षण कार्य प्रसंशीय रहेको बताएका थिए ।

कार्यक्रममा लमजुङ सामुदायिक अस्पतालका चिकित्सकहरूले बालबालिकाको स्वास्थ्य परीक्षण तथा भूपू सैनिक डेन्टलहोमले पनि बालबालिकाको निःशुल्क दन्त परीक्षण गरेका थिए ।