काठमाडौं, पुस २४ ।
सरकारले आज बस्ने व्यवस्थापिका संसद् बैठकमा संविधान संशोधन प्रस्ताव अघि बढाउने तयारी गरेको छ । प्रस्ताव पेश गर्नेबारे शनिबार नेकपा माओवादीका अध्यक्ष एवं प्रधानमन्त्री पुष्पकमल दाहाल, सत्तारुढ दल नेपाली कांग्रेसका सभापति शेरबहादुर देउवा र मधेशी मोर्चाका नेताबीच अनौपचारिक छलफलसमेत भएको छ ।

यसैगरी संशोधन प्रस्ताव पेश गर्ने तयारीबारे राष्ट्रिय मधेश समाजवादी पार्टीका अध्यक्ष शरदसिंह भण्डारीले पनि प्रधानमन्त्री दाहाल र कांग्रेस सभापति देउवासँग टेलिफोन वार्ता गरेका छन् ।

त्यसैगरी, प्रमुख प्रतिपक्षी दल नेकपा एमालेले भने संसद्को गतिरोध हटाउने विषयमा नौ दलीय गठबन्धनको आज बस्ने बैठकले निर्णय गर्ने जनाएको छ ।

ललितपुर भैसेपाटीस्थित एमाले उपाध्यक्ष बामदेव गौतमको निवासमा बसेको पार्टीको स्थायी समिति बैठकले सर्वोच्च अदालतको आदेशले संविधान संशोधनको विषयमा स्पष्ट उल्लेख गरेकाले सत्तारुढ दलले आफ्नो अडान त्याग्नुपर्ने बैठकले निष्कर्ष निकालेको एमाले सचिव प्रदीप ज्ञवालीले जानकारी दिएका छन् ।

एमालेको बैठकले संशोधन विधेयक फिर्ता लिई मुलुकलाई निर्वाचनमा केन्द्रित गराउन सरकारलाई पुनः आग्रह गरेको छ । सभामुख ओनसरी घर्तीमगरले संसद् बैठक आज दिउँसो १ बजे बोलाएकी छन् ।