काठमाडौं, पुस २५ ।
काठमाडाैंको त्रिपुरेश्वरस्थित दशरथ रंगशालामा जारी रहेको आठौँ मिडिया कप फुटबल प्रतियोगिताअन्तर्गत डिफेण्डिङ च्याम्पियनमा कान्तिपुर मिडिया ग्रुप र एपी वान टेलिभिजनले जित निकालेकाे छ । नेपाल ओलम्पिक संग्रहालयद्वारा आयोजित प्रतियोगिताको समूह ‘ए’ को लिग खेलमा कान्तिपुरले नेपाल टेलिभिजन (एनटीभी) लाई २–१ गोलले पराजित गरेको हो । कान्तिपुरका नवीन खड्काले दुई गोल गरेका हुन् । एनटीभीका सुशील अधिकारीले एक गोल गरेका थिए ।

समूह ‘ए’ कै अर्को लिग खेलमा एपीले एभिन्युजलाई ५–१ गोल अन्तरले हरायो । एपीका लागि प्रसित हुमागाईंले ह्याट्रिक गरे भने शंकर खड्का र सुवास समलले १–१ गोल थपेका थिए । एभिन्युजका सञ्जय श्रेष्ठले एक गोल फर्काए । भाेलि मंगलबार हुने समूह ‘बी’ को एक मात्र खेलमा रेडियो नेपालले इमेज च्यानलविरुद्ध प्रतिस्पर्धा गर्ने भएकाे छ ।