काठमाडौं, बैशाख ४ ।
युनिभर्सिटी अफ बेडफोर्डसायर, बेलायतबाट सम्बन्धन प्राप्त पाटन कलेज फर प्रोफेशनल स्टडिजले स्नातक स्तरको बिएस्सी, अनर्स इन कम्प्यूटर साइन्स एण्ड सफ्टवेयर इञ्जिनियरिङ्ग र ब्याचलर इन बिजनेश एडमिनिष्ट्रेशन कार्यक्रम सुरु गरेको छ ।

शिक्षामन्त्री धनीराम पौडेलले एक समारोहबीच सो कलेजको उद्घाटन गरेका छन् । उक्त कार्यक्रममा बेलायती राजदूत रिचर्ड मोरिस र विश्वविद्यालयका सहायक उपकुलपति अशरफ जाबेदको समेत सहभागिता रहेको थियो । सो कार्यक्रमको अध्यक्षता संस्थापक परमानन्द केजरीवालले गरेका हुन् ।

सोही अवसरमा विश्व विद्यालय र पाटन कलेजबीच सूचना प्रविधि र व्यवस्थापन विषयमा स्नाकोत्तर स्तरको कार्यक्रम सञ्चालन गर्ने सम्झौता पत्रमा विश्वविद्यालयकातर्फबाट उपकुलपति अशरफ जाबेद र पाटन कलेजकोतर्फबाट अध्यक्ष पञ्कज जलानले हस्ताक्षर गरेका छन् ।

टाइम्स युकेको र्‍याङ्किङ्गअनुसार एक सय ३० वर्ष पुरानो युनिभर्सिटी अफ बेडफोर्डसायर विश्वको उत्कृष्ट आठ सय विश्व विद्यालयमध्ये एक हो । यो विश्व विद्यालयमा एक सय २० मुलुकको २२ हजार विद्यार्थी अध्ययनरत रहेका छन् । उक्त विश्वविद्यालयको कार्यक्रमहरू चीन र भियतनामलगायत मध्य पूर्व, यूरोप, दक्षिण पूर्व एशियालगायतका अन्य देशहरूमासमेत सञ्चालित रहेको छ । विश्वविद्यालयबाट अध्ययन गरेका ९२ प्रतिशत विद्यार्थीहरूले छ महिनामै काम गर्न थाल्छन् वा उच्च शिक्षा अध्ययन तिर लाग्छन् ।

तीन वर्षको अध्ययन अवधि र तीन सय ६० क्रेडिट आवर भएको बिएस्सी, अनर्स इन कम्प्यूटर साइन्स एण्ड सफ्टवेयर इञ्जिनियरिङ्ग र ब्याचलर इन बिजनेश एडमिनिष्ट्रेशन मात्र प्राज्ञिक डिग्री होइन, यसका स्नातकहरू विज्ञ जस्तै हुन्छन् ।

विद्यार्थीले चाहेमा यस पाटन कलेज फर प्रोफेशनल स्टडिज्मा प्रथमलगायत अन्य वर्ष सकाएर बाँकी समयको अध्ययन युनिभर्सिटी अफ बेडफोर्डसायर, बेलायतको मूल क्याम्पसमा गर्न सक्छन् ।