काठमाडौं, बैशाख ४ ।
काठमाडौं उपत्यकालाई ‘हर्न निषेधित क्षेत्र’ बनाउने अभियान सुरु गरेको ट्राफिक प्रहरीले अब जथाभावी बाटो काट्ने पैदलयात्रुलाई पनि कारबाही गर्ने तयारी भएको छ । महानगरीय ट्राफिक प्रहरी महाशाखाले बैशाखको अन्तिमदेखि यो नियम लागू गर्न लागेको हो ।

नियम उल्लंघन गर्ने पैदलयात्रुलाई पनि कारबाही गर्ने तयारी भइरहेको महाशाखाका डिआइजी मिङमार लामाले जानकारी दिएका छन् । नियम लागू गर्ने तयारी अन्तिम चरणमा रहेको जनाउँदै उनले बैशाख मसान्तदेखि कार्यान्वयनमा आउन सक्ने बताए ।

नयाँ नियम लागू भएपछि अब पैदलयात्रुले तोकिएको ठाउँबाट मात्र बाटो काट्नुपर्ने हुन्छ । अबदेखि जेब्रा क्रसिङको प्रयोग, ओभरहेड तथा तोकिएको बाटोबाट मात्रै पैदलयात्रुले हिँड्नुपर्नेछ । सो नियम उल्लंघन गर्ने पैदलयात्रुलाई पनि कारबाही हुने ट्राफिक प्रहरीले जनाएको छ । यो नियम उल्लंघन गर्ने पैदलयात्रुलाई दुई सय रुपैयाँ जरिवाना गरिने डिआइजी लामाले बताएका हुन् ।