भक्तपुर, बैशाख ५ ।
भक्तपुरको सूर्यविनायक नगरपालिका–१ सिरुटारस्थित चापाखर्कको पुरानो खानेपानी ट्याङ्की परिसरमा डिप बोरिङ गरिरहँदा आगोको मुस्लो निस्केपछि खानेपानी ट्याङ्की नजिकै रहेको पिलागाउँ तनाबमा परेको थियो ।

आज बिहान नौ बजेदेखि निस्केको आगोको मुस्लो करिब चार घण्टापछि नियन्त्रणमा आएको प्रहरीले जनाएको छ ।

आगो निभाउनका लागि काठमाडौं, भक्तपुर र ललितपुरका गरी तीन वटा दमकलले पानी तथा रसायन प्रयोग गरी नेपाल प्रहरी, सशस्त्र प्रहरी र स्थानीय बासिन्दाको सहयोगले आगो नियन्त्रणमा लिएको थियो ।

आगलागीका कारण उक्त क्षेत्रमा डिप बोरिङमा प्रयोग गरिएको मेसिन लगायत वरपर रहेका तारहरू समेत जलेका थिए ।

करिब एक सय ८० फिट गहिराईसम्म खनिएको उक्त ठाउँबाट ग्याँस निस्केर आगलागी भएको स्थानीय प्रहरीले जनाएको छ ।