एजेन्सी, माघ ५ ।
दक्षिणपूर्वी एशिया र अष्ट्रेलियाको छ दिने भ्रमणका क्रममा मंगलबार भियतनाम पुगेका जापानका प्रधानमन्त्री शिन्जो आवेले समग्र भियतनामको विकासका लागि भियतनामका निजी तथा सरकारी क्षेत्रलाई सहयोग गर्ने बताएका छन् ।

भियतनामको राजधानी हानोईमा आयोजित जापान र भियतनामका व्यापारीक नेताहरूको एक बैठकमा उनले सो कुरा बताएका हुन् ।

भियतनामका प्रधानमन्त्री गुयेन छुवान फुक तथा आवेबीचको भेटवार्तामा दुबै देशबीच व्यापार तथा लगानी विस्तारका लागि सहमति भएको छ । भेटमा आवेले दक्षिण पूर्व एशियाली राष्ट्र संघसँगको सहकार्यको बारे बताउँदै यसको केन्द्रको रूपमा भियतनाम रहने जानकारी दिएका छन् ।

आवेले फुक समक्ष जापानी कम्पनीसँगको सहकार्यमा काम गरेमा उच्च स्तरको ज्ञान तथा विशेषज्ञतामा काम सम्पादन हुने बताएका छन् ।