ललितपुर, बैशाख ८ ।
नेपालभाषाको साहित्यिक क्षेत्रको विकास र उत्थानमा थप प्रोत्साहन गर्न हरेक महिना आयोजना गरिँदै आएको ‘सः छगू फरक अभिव्यक्ति’ अर्थात आवाज एक फरक अभिव्यक्तिको आयोजनामा पाँचौँ संस्करणअन्तर्गत शनिबार ललितपुरको इखालखुस्थित तःलाछेँमा तीन जना लघुकथाकारहरूले संयुक्त रूपमा लघु कथा बाचन गरेका छन् ।

कार्यक्रममा लघुकथाकारहरू क्रमशः महेन्द्र गोपाल कर्माचार्य, समान्त श्रेष्ठ, दिल बहादुर चित्रकार (तुयू पुं)ले आ–आफ्नो पाँच–पाँच वटा लघु कथा बाचन गरेका थिए ।

नरेश अमात्यले सञ्चालन गर्नुभएको सो कार्यक्रममा कथा बाचकहरूलाई साहित्यकार सुनिल बज्राचार्यले स्वागत मन्तव्य राखेका थिए । कार्यक्रममा नेपाली तथा नेपालभाषाका प्रखर साहित्यकार सुधिर ‘ख्वबि’ले मायाको चिनो हस्तान्तरण गरेका हुन् ।

कार्यक्रममा सहभागीहरूमध्ये एक व्यक्तिले अर्को व्यक्तिलाई मायाको चिनो दिने क्रममा गीतकार बंशीधर बज्राचार्यले साहित्यकार मंगलनारायण जोशीलाई प्रदान गरेका हुन् ।

उक्त कार्यक्रममा वरिष्ठ साहित्यकार एवं समालोचक तथा पूर्वडेपुटी गभर्नर डा. पुष्पराज राजकर्णिकारले आफ्नो मन्तव्य राख्ने क्रममा तीन जना साहित्यकारहरूको लघु कथा बाचनले नयाँ स्वादसँगै मिठो आभाषको अनुभूति गर्न पाएको बताउँदै कार्यक्रममा पहिलाको भन्दा थप नयाँ ट्रेन आएको बताएका छन् ।

कार्यक्रममा नेपालभाषा केन्द्रीय विभागका पूर्वप्राध्यापक एवं वरिष्ठ समालोचक प्रा. नर्मदेश्वर प्रदान, साहित्यकारहरू भगतदास श्रेष्ठ, नेपालभाषा मंकाः खलः काठमाडौंका नरेश शाक्य, मथुरा साय्मि, केदार सितु, नेपालभाषा मंकाः खलः ललितपुरका पूर्वअध्यक्ष ऋषिप्रसाद श्रेष्ठलगायतको उल्लेख्य उपस्थिति रहेको थियो ।