पोखरा, माघ ६ ।
पोखरामा जारी रहेको आहा रारा गोल्ड कप फुटबल प्रतियोगिताअन्तर्गत आजको प्रतिस्पर्धात्मक खेलमा झापा–११ क्वाटर फाइनलमा प्रवेश गरेको छ ।

खेलमा अमेरिकी एएनए युएसए फुटबल टीमलाई ४–१ गोलले पराजित गर्दै झापा–११ ले अन्तिम आठमा स्थान बनाउन सफल भएको हो ।

झापालाई जिताउन कर्ण लिम्बुले ह्याट्रिक गोल गरेका हुन् । उनले खेलको २४ औँ, ३० औँ र ९० औँ मिनेटमा गोल गर्दै जारी प्रतियोगिताकै पहिलो ह्याट्रिक पूरासमेत गरेका हुन् । झापाको लागि अर्को गोल खेलको ‘म्यान अफ द म्याच’ घोषित कर्ण लिम्बुकै पासमा ७४ औँ मिनेटमा बुद्ध चेम्जोङले गरेका थिए ।

अमेरिकी फुटबल टीम एएनएको तर्फबाट खेलको ८५ औँ मिनेटमा शिशिर विश्वकर्माले एक मात्र गोल गरेका थिए । प्रतियोतिगाअन्तर्गत भोलि संकटा र नेपाल पुलिस क्लबबीच प्रतिस्पर्धा हुने आयोजक साहारा क्लबले जनाएको छ ।