– रामकुमार पुराकोटी
सम्माननीय प्रधानमन्त्रीज्यूलाई मेरो हार्दिक नमन टक्र्याउँदछु । हजुरहरूको यो पाँच वर्षीय स्थायी सरकारलाई पनि बधाई दिन चाहन्छु । र, यो सरकारको सधैँ भलो होस् भन्ने कामना पनि गर्दछु । अहिलेको सरकार दुई तिहाई सरकार रहेकोमा एकथरी खुसी पनि छु, अर्कोथरी दुःखी पनि छु । हजुरको भाषण पत्रपत्रिका, अनलाईन र टिभीमा धेरै सुनियो । धेरै राम्रा कुरा बोल्नु भयो त्यसमा म एकदमै खुसी छु । तर, यहाँ बोलेर मात्र कसैको पनि हात मुख जोडिन्न । त्यसका लागि बोलेको कुरा पूरा भएपछि मात्र सबैको हात मुख जोडिन्छ ।

हरेक भाषणमा हजुरले आश्वासन नै बढी दिनुहुन्छ, सुन्दा निक्कै खुसी पनि लाग्छ र आनन्दित पनि हुन्छु । तर, पूरा भने भएको खासै देखिएन । यहाँको पाँच वर्षीय स्थायी सरकार गठन भएको पनि दुई वर्षमा टेक्दैछ तर, पनि जनताको अपेक्षाअनुसार काम भएको देखिएन । यहाँ सबैले परिणाम खोज्दछ । दिनहुँ हात मुख जोड्न बिहान–बेलुका नभनी । आफ्नो हातका नङग्रा खियाएर परिवार पाल्न घाम पानी नभनी आफ्नो कर्मथलोको खोजीमा भौतारिरहेको सबैले देखेकै कुरा हो ।

हजुर पटक–पटक प्रधानमन्त्री हुँदा कहिले घर–घरमा ग्याँसको पाईप बिछ्याई दिन्छु भनी भाषण गर्नु हुन्छ । कहिले हावाबाट बत्ती बाल्दिने कुरा गर्नुभयो त कहिले डुङ्गा चलाएर देखाई दिन्छु भन्नहुन्छ त कहिले रेल गुडाउने आश्वासन दिनुहुन्छ । तर, कुन कुराले अहिलेसम्म पूर्णता पाएको छ प्रधानमन्त्रीज्यू । सबै हावामा गफ हाने जस्तै अनुभूति गर्नु बाहेक खासै उदाहरणीय कार्य भएको जनताले महशुस गर्न पाएको छैन ।
भ्रष्टाचार मुक्त गर्ने कुरा गर्नु हुन्छ तर, दिनहुँ यहाँ भ्रष्टाचारका समाचार सुन्नमा आउँछ । हजुर मात्र भ्रष्टाचार मुक्त भएर यहाँ केहीँ हुने वाला छैन, भ्रष्टाचारको जडै उखेल्न भने हजुरले अहिलेसम्म किन सकिएन । नेतादेखि मन्त्रीसम्म भ्रष्टाचारमा मुछिएका छन् तर, कारबाही कसलाई कति गर्नु भयो त्यसको अहिलेसम्म कुनै लेखाजोखा छ कि छैन ?

अहिलेको जल्दोबल्दो विषय भनेको यहाँका रैथाने स्थानीयबासीहरूको गुठीमा आँखा लगायौँ अहिले त्यसले कस्तो रूप धारण गरिरहेको छ त्यसको यहाँ बयान गरिरहनु पर्दैन । जब दिनहुँ जसो एक–एक गर्दै आन्दोलन चर्किँदै गयो तब गुठी विधेयक फिर्ता भएको घोषणा गरियो तर, खारेज नै नगरिकन जनतालाई लालिपप दिएर फकाउने कोशिस मात्र गरियो तर, जनताले बुझी सकेको छ र देखि पनि सकेको छ । यो सरकारले अझैँ पानीमा आँखा खोल्न लगाउनेसम्मको हर्कत गरेको भन्दा पनि फरक पर्दैन ।

जब जनता जाग्छ आगोको ज्वाला निस्किन्छ भन्ने कुराको उदाहरण दिन जनता गुठी विधेयक खारेजीको माग गर्दै हजारौँको संख्यामा दिनहुँ विभिन्न जिल्लाबाट प्रदर्शन र मसाल जुलुस निकाली व्यापक जनप्रदर्शनमा उत्रिरहेका छन् । अहिलेकाे सरकारले अरिङ्गालमा हात हाल्ने काेशिस गरिरहेकाे महशुस भएकाे छ त्यसमाथि पनि जनतालाई आँखामा धूल झोक्ने काम गर्न सरकार पछि हटेन किन ? के यो सरकारले दुई तिहाईको दम्भ नै देखाएर जनतालाई पेलेर नै जाने निधो गरेकै हो त ? जनता जब एकजुट भएर उठ्छ न त पार्टीको कार्यकर्ता हुँ भनेर पछि हट्छ न त मेरो आफन्त नै हो भनेर हात पछाडि सार्छ । रगत तातेपछि को मान्छेले कस्तो रूप धारण गर्छ यो कुराको बयान पनि यहाँ गर्नु आवश्यक छैन । अहिले गुठी विधेयकविरुद्ध सडकमा मानवसागर ओर्लिएको कुराले छर्लङ्ग हुन्छ कि यहाँ पार्टीभन्दा पनि आफ्नो अधिकारको लागि निश्पक्ष रूपमा हातमा हात मिलाएर ऐक्यबद्धता जनाएर सडकमा जनता ओर्लिएका छन् ।

हरेक कुराको सीमा हुन्छ जब सीमा नाघ्न खोज्छ त्यसको परिणाम पनि नराम्रै हुन्छ । त्यसैले जनताका लागि यो सरकार हो भने जनताको मनोभावनामा ठेस लाग्ने कुनै कार्य नगर्नु नै उचित हुन्छ । होइन सरकार मेरो हो, म नै हुँ सबै भन्ने दम्भ राख्नुहुन्छ भने आफूले आफूलाई मेरो गोरुको बार्‍है तक्का भनेर अडिग भएर बसे त्यसको परिणाम भयंकर ठूलो हुनेमा पनि कुनै दुई मत छैन ।

त्यसैले मेरो प्रधानमन्त्रीलाई विनम्र आग्रह छ । जनताको मनोभावनालाई बुझेर सरकारलाई निरन्तरता दिँदा राम्रो हुन्छ होइन सरकारको तागत कति छ भनेर देखाउने प्रयासमा लाग्नु भयो भने परिणाम नराम्रो आउनेमा कुनै बार कुर्नु आवश्यक छैन ।

त्यसैले प्रधानमन्त्रीलाई पुनः आग्रह गर्दछु । दुई तिहाई सरकार त गठन गर्नु भयो, स्थायी सरकार बनेकोमा जनता अहिले खुसी त भए तर, दुई तिहाईकै दम्भमा सीमा नाघेर अगाडि नबढ्दा राम्रो हुन्छ । अहिलेको मानवसागरले यो कुराको पुष्टी गर्छ कि जब जनता जाग्छ त्यसलाई कसैले रोक्न सकिँदैन । आफ्नो अधिकार मागेर पाएन भने खोसेर लिन जनता तम्सिएका छन् ।

देश तब बन्छ जब जनताको साथ र समर्थन सधैँ रही रहन्छ । जब जनताले नै साथ दिँदैन भने त्यो सरकार टिकिरहन्छ भने कुराको सपना पनि नदेखेकै राम्रो हुन्छ । सरकारले यो कुरामा ध्यान दिओस् कि सडकमा ओर्लिएको मानवसागरलाई तितर बितर पार्न नेपाल प्रहरी, सशस्त्र प्रहरी लगाउँदैमा पानीको फोहराले हान्दैमा १०–१२ राउण्ड अश्रुग्याँस फायर गर्दैमा यो जनता भागेर जानेमा परेन भन्ने कुराको पनि अहिलेसम्म भएका आन्दोलनले छरपस्ट देखाई सकेको छ । त्यसैले नेपाली जनतालाई सम्मान गर्न प्रधानमन्त्रीज्यूले अवश्य पनि भूल गर्नु हुँदैन भन्ने कुरामा म आशावादी हुँदै बिदा हुन्छु ।
उहीँ निष्पक्ष जनता ।