काठमाडौं, बैशाख १३ ।
रियल मड्रिडका फरवार्ड ग्यारेथ बेलले यो सिजनमा बाँकी भएका महत्वपूर्ण खेलहरू गुमाउने खतरा बढेको छ ।

शरीरको पिँडौलाको चोटका कारण बेलले यो सिजनका बाँकी खेलमा मैदान बाहिर रहने खतरा बढेको हो । स्पेनिस ला लिगाअन्तर्गत भएको खेलमा आइतबार राति भएको इएल क्लासिकोको ३९ औं मिनेटमा बेल घाइते भएका थिए ।

रियल मड्रिडले चोटका कारण उनी कहिलेसम्म मैदानमा आउँन सक्छन् भन्ने केही बताएको छैन । स्पेनिस पत्रिका एएसले भने बेल तीनदेखि चार हप्तासम्म मैदान बाहिर रहने बताएको छ । रियल मड्रिडले च्याम्पियन्स लिग सेमिफाइनलको पहिलो लेगमा आउँदो मंगलबार एथ्लेटिको मड्रिडसँग खेल्दै छ ।

आइतबार रातिको इएल क्लासिकोमा ३९ औं मिनेटमा बेल मैदान बाहिर गएका थिए । यो खेलमा रियल ३ विरुद्ध २ गोलले पराजित भयो । रियल र बार्सिलोनाको अहिले ला लिगामा बराबर अंक रहेको छ । यो हप्ता ला लिगामा रियलले दुईवटा महत्वपूर्ण खेल खेल्दै छ । बुधबार राति डिप्रोटिभो डी लाकोरुना तथा शनिबार राति भ्यालेन्सियासँग खेल्ने खेलमा बेल हुने छैनन् ।