काठमाडाैं, असार ३१ ।
यहीँ असार २६ गते साँझबाट निरन्तर रूपमा परेको अविरल वर्षाको कारण देशका विभिन्‍न जिल्लाको विभिन्‍न स्थानहरूमा बाढी/पहिरो प्रभावित क्षेत्रको जनजीवनलाई सामान्य अवस्थामा ल्याउनको लागि नेपाली सेनासँग भएका सबै किसिमका विपद्‍ उद्दारका सामग्रीहरूसहित खोज, उद्दार तथा राहत कार्यमा करिब १५,००० फौज खटिरहेका छन् ।

बाढी/पहिरो प्रभावित क्षेत्रमा नेपाल सरकार तथा जिल्ला विपद् व्यवस्थापन समितिद्वारा वितरण गर्न तयार गरिएको राहत सामग्रीहरू नेपाली सेनाको हवाई साधनमार्फत सम्बन्धित स्थानमा पुर्‍याउन सहयोग गर्नुको साथै स्थानीयस्तरमा राहत वितरणको कार्यमा समेत आवश्यक सहयोग गरिरहेको छ । त्यस्तै अविरल वर्षासँगै गएको पहिरोका कारण अवरुद्ध भएका विभिन्न राजमार्गहरू सुचारु गरी यातायात सञ्चालन सहज गर्न सहयोग गर्ने र तटीय क्षेत्रमा तटबन्दको निर्माण, नाला सफाई जस्ता कार्यहरूलाई जारी राखिएको छ ।

खोज, उद्दार तथा राहत वितरणकै क्रममा असार ३० गते बाजुरा जिल्ला त्रिवेणी नगरपालिका वडा नं.–९ पैमा ईलाकामा बुढीगङ्गा नदी थुनिने सम्भावना बढ्दै गइरहेको अवस्थालाई मध्यनजर गर्दै श्री सुदूर पश्चिम पृतना हेडक्वाटरका पृतनापति उपरथी बालकृष्ण कार्कीको कमाण्डमा खटिएको टोलीले हेलिकोप्टरमार्फत उक्त नदीको अवस्थाबारे आवश्यक रेकी गरी नदीको बहावलाई सुचारु गराउन कैलालीस्थित श्री कालीरक्षा गणको इञ्जिनियर से.मु. तयारी अवस्थामा राखिएको छ । यसैगरी, आज असार ३१ गते ललितपुरको वागमती गाउँपालिका-६, प्युटारमा राहत वितरणको कार्यसमेत गरिएकाे छ । झापा जिल्लाको शिवसतासी नगरपालिका—७ माईखोला ईलाकामा २८ गतेदेखि माईखोलाको बाढीले बगाएर हराइरहेका तीन जना छात्राहरूको खोजी कार्य गर्न फौजसमेत परिचालन भएको छ। उदयपुर जिल्लाको रोतामाई गाउँपालिका-६ हलेगाउँस्थित छबियाखोला ईलाकामा बाढीले बाँध भत्काएको कारण उक्त स्थानमा बाँध पुनःनिर्माण कार्य गरिरहेको छ । रसुवा जिल्लाको स्याफ्रुबेशी खण्डको गोसाईकुण्ड गाउँपालिका वडा नं.–३ लिगलिग भन्ने स्थानमा पहिरो गएर बाटो अवरुद्ध भएकोमा फौज परिचालनपश्चात पहिरो हटाई बाटो सुचारु गरिसकेकाे नेपाली सेनाले आज एक प्रेस विज्ञप्ति जारी गर्दै साे कुराकाे जानकारी गराएकाे छ ।

त्यसैगरी, खोज, उद्दार तथा राहतको लागि काठमाडाैंमा दुई वटा MI 17, एउटा ALH, एउटा Augusta र एउटा इक्युरेल हेलिकाेप्टर तयारी अवस्थामा राखिएको छ भने ईटहरीमा एउटा बेल हेलिकाेप्टर र धनुषामा एउटा MI 17 हेलिकाेप्टर तयारी अवस्थामा रहेकाे जारी विज्ञप्तिमार्फत जनाएकाे छ ।