काठमाडौं, माघ ८ ।
भारतीय टेलिभिजनबाट प्रशारित चर्चित कलर्स रियालिटी शो ‘झलक दिखला जा’ मा नेपाली चेली तेरिया फौजा मगरले पुनः एक पटक चर्चित भारतीय कलाकारहरूलाई पछि पार्दै उत्कृष्ट नृत्यको उपाधि जित्न सफल भएकी छन् ।

यसअघि सन् २०१४ मा तेरियाले सर्वोत्कृष्ट नृत्य प्रस्तुत गर्दै जी टिभीको रियालिटी शो ‘डान्स इण्डिया डान्स–लिटिल मास्टर’को उपाधि हात पारेकी थिइन् । नवौँ श्रृंखलाको ‘झलक दिखला जा’ सहित तेरियाले नृत्यमा भारतमा दुई वटा उत्कृष्ट उपाधि जितेकी हुन् ।

रूपन्देही रुद्रपुरकी १४ वर्षीया तेरियाले आफू उक्त प्रतियोगितामा दर्शकहरूको अपार भोटबाट उत्कृष्ट भएको जानकारी शुक्रबार दिउँसो आफ्ना हजुरबुबा कृष्ण फौजा मगरलाई गराएकी थिइन् । आफ्नी नातिनी तेरियालाई जिताउन आफूले सञ्चालन गरेको अभियानमा पुनः एक पटक नेपालीहरूले महत्वपूर्ण साथ दिएर नेपाललाई विश्वसामु चिनाउन ठूलो सहयोग गरेको तेरियाका हजुरबुबा कृष्णले बताए । तेरियाले नेपालमै आफ्ना गुरुहरूसँग नृत्य सिकेर भारतमा सो सफलता हात पारेकी हुन् ।

भारतीय अनलाइन बलिउड लाइफ डट कमकाअनुसार उक्त प्रतियोगिताको अन्तिम प्रतिस्पर्धामा तेरियाले सबैभन्दा बढी एसएमएस र अनलाइन भोट प्राप्त गरेर बिजेता बनेकी हुन् । शनिबार बेलुका १० बजेपछि कलर्स टेलिभिजनको ‘झलक दिखला जा’को फाइनल शोमा नेपाली चेली तेरियालाई औपचारिक रूपमा बिजेता घोषणा गरिने सो अनलाइनले उल्लेख गरेको छ ।

‘झलक दिखला जा’को फाइनलमा भारतका दुई चर्चित नृत्य कलाकार सलमान युसुफ र सान्तनु महेश्वरीसँग तेरियाको प्रतिस्पर्धा हुँदै थियो । सलमान ‘डीआईडी’ पहिलो सिजनका बिजेता तथा ‘झलक दिखला जा’का पूर्व बिजेता हुन् । सोही कारण पनि प्रतियोगितामा तेरियाभन्दा सलमानको बढी चर्चा रहेको थियो ।

यस्तै सान्तनु वल्ड हिपहप च्याम्पियनशीपका बिजेता हुन् । तर, यी दुबैलाई पछि पार्दै तेरियाले भारतीय रियालिटी सो ‘झलक दिखला जा’ को इतिहासमा गैरभारतीय भएर पनि बिजेताको रूपमा आफ्नो नाम लेखाउन सफल भएकी छन् । उपाधिसँगै उनले भारतीय रुपैयाँ ३० लाख र ‘रेनाल्ड डस्टर’ ब्राण्डको कार उपहार प्राप्त गर्दै छिन् ।

तेरियाका हजुरबुबा कृष्ण भारतीय सेनाबाट अवकाश प्राप्त व्यक्ति हुन् । उनले नै चार वर्ष अघि आफ्नी नातिनी तेरियालाई मुम्बईमा लगेर ‘डान्स इण्डिया डान्स’ (डीआईडी लिटिल मास्टर) मा सहभागी गराएका थिए । सो प्रतियोगितामा उत्कृष्ट भएर पुरस्कार जितेपछि तेरियाले विश्वका विभिन्न देशमा पुगेर नेपाली झण्डा फहराउँदै आफ्नो नृत्य प्रस्तुत गरिसकेकी छन् । डीआईडी च्याम्पियन बनेपछि तेरिया मुम्बईमै बसेर अध्ययन गर्दै आइरहेकी छन् । मुम्बईको सेन्ट लरेन्स हाईस्कूलमा अध्ययनरत तेरिया भविष्यमा विश्व चर्चित नृत्य कलाकार बन्न चाहन्छिन् । नृत्यमा जस्तै उनी अध्ययनमा पनि अब्बल भएको सो विद्यालयका शिक्षकले बताएका छन् ।