भक्तपुर, माघ ८ ।
नेकपा एमाले भक्तपुरद्वारा आज आयोजित पार्टीका नयाँ संगठित सदस्यहरूलाई सपथ ग्रहण कार्यक्रममा बोल्दै नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले यतिबेला विभिन्न प्रकारका शक्तिहरू देशलाई गलत बाटोमा धकेल्न खोजिरहेको बेलामा देशको राष्ट्रियता, एकता र अखण्डतालाई कमजोर पार्न सत्तापक्षले संविधान संशोधनको बाजा बजाएको बताएका छन् ।

‘एमाले बाहेकले अहिले जुन बाजा बजाउँदै छन्, त्यो देशविरुद्धको बाजा हो, देशको एकताको विरुद्धको बाजा हो, त्यसैले एमालेले कुनै हालतमा संविधान संशोधन गरेर मुलुकलाई कमजोर पार्ने षड्यन्त्र सफल हुन दिने छैनौँ ।’ अध्यक्ष ओलीले भने ।

बाजा वा शंख बज्यो भन्दैमा शुभ भन्न नहुने धारणा राख्दै उनले भने, ‘बाजा बज्यो भन्दैमा त्यो शुभ मात्र हुँदैन, त्यो बाजा कस्तो धुनमा बजाइयो ?, हाम्रो चलन छ शंख बजाउने, कुन धुनमा शंख बजायो भने शुभ कुन धुनमा शंख बजायो भने अशुभ हुन्छ भन्ने ?, शंख त शंख नै हो नि, बाजा त बाजा नै हो नि । कतैकतै मान्छे जन्मिदा पनि बाजा बजाइन्छ, मान्छे मर्दा पनि बाजा बजाइन्छ, घाट लैजाँदा पनि बाजा बजाउने चलन छ, सबै बाजा बज्ने बित्तिकै शुभ हुँदैन, बाजा बज्ने बित्तिकै खुसीयाली हुँदैन, त्यो दुःखको हो कि सुखको हो, के धुन हो त्यो बुझ्नु आवश्यक छ ?

अबको १० महिनाभित्र तीन वटै तहको निर्वाचनको मिति सरकारले घोषणा गर्नुपर्नेमा जोड दिँदै अध्यक्ष ओलीले आगामी कात्तिक–मंसिरसम्म तीन वटै तहको निर्वाचन गर्ने गरी कार्यतालिका सार्वजनिक गर्न सरकारलाई आग्रह समेत गरेका छन् ।