काठमाडौं, बैशाख १५ ।
इंग्लिस क्लब म्यानचेस्टर युनाइटेड बार्सिलोनाका स्टार खेलाडी नेइमारलाई क्लब भित्र्याउन १७० मिलियन पाउण्ड स्ट्रर्लिङ (२२ अर्ब २७ करोड रुपैयाँ) खर्च गर्न तयार रहेको बेलायती पत्रिका द सनले जनाएको छ ।

नेइमारले आफ्ना नजिकका साथीसँग म्यानचेस्टर युनाइटेड आउँदो समरमा विन्डोमा आफूलाई क्लब भित्र्याउन कीर्तिमानी मूल्य तिर्न तयार रहेको बताएको द सनले लेखेको छ । युनाइटेडका प्रशिक्षक जोसे मोरिन्हो नेइमारलाई क्लब भित्र्याउन बार्सिलोनालाई तिर्नु पर्ने रकमको सीमामा पुग्न तथा नेइमारलाई कीर्तिमानी पारिश्रमिक दिन तयार रहेका छन् ।

नेइमारले गएको सिजन बार्सिलोनासँग पाँच वर्षको नयाँ सम्झौता गरेका थिए । बार्सिलोनाले नेइमारलाई किन्न चाहने क्लबले झण्डै १७० मिलियन पाउण्ड तिर्नु पर्ने सीमा तोकेको छ ।

युनाइटेड राम्रा खेलाडीमा खर्च गर्न नडराउने क्लबमा पर्छ । यो सिजनको सुरुमा युनाइटेडले पउल पोग्बालाई ८९ मिलियन पाउण्ड स्ट्रर्लिङ खर्च गरेर भित्र्याएको थियो । तर बार्सिलोना नेइमारलाई गुमाउन चाहँदैन त्यसै कारण नेइमार युनाइटेडमा अनुबन्ध हुनेमा शंका गरिएको छ ।