काठमाडौं, बैशाख १७ ।
जारी रहेको स्पेनिस ला लिगामा इस्पान्योलविरुद्धको खेलमा लुइस सुवारेजले दुई गोल गरेपछि बार्सिलोनाका तीन खतरनाक स्ट्राईकर एमएसएनले नयाँ कीर्तिमानी कायम गरेका छन् ।

गएराति भएको खेलमा सुवारेजले दुई गोल गर्दै आफ्नो टीमलाई ३ विरुद्ध शून्य गोलले जिताउन सफल भएका छन् ।

उनले ५० औँ मिनेटमा गरेको पहिलो गोल बार्सिलोनाका तीन हस्ती लिओनल मेसी, लुइस सुवारेज र नेइमारले ला लिगामा क्लबका लागि गरेको तीन सय ५० औँ गोल हो । सन् २०१४ को अन्त्यतिर सुवारेज इङ्गलिस क्लब लिभरपुलबाट बार्सिलोना आएपछि मेसी, सुवारेज र नेइमारको नाममा ‘एमएसएन’ को खतरनाक जोडी निर्माण हुन पुगेको हो ।

यी तीन जनाको सहभागितामा मेसीले सर्वाधिक एक सय ४८ औँ गोल गरेका छन् । यसपछि सुवारेजले एक सय १८ र नेइमारले ८५ गोल गरेका छन् । यी तीनको साझेदारीमा हाल तीन सय ५१ गोल भएको छ ।